Búgin Ázerbaıjan astanasy Bakýde nysana kózdeýden 53-shi álem chempıonatynyń resmı ashylýy ótti. Bul týraly QR MSM Sport jáne dene shynyqtyrý isteri komıteti Sportty damytý dıreksııasynyń baspasóz qyzmeti málimdedi, dep habarlaıdy Egemen.kz.
«Baku Crystal Hall» ámbebap kesheninde ótken is-shara kezinde ár el ókilderi men sportshylarynyń aldynda Halyqaralyq nysana kózdeý federasııasynyń (ISSF) prezıdenti Lýchano Rossı, Ázerbaıjannyń jastar jáne sport mınıstri Farıd Gaıbov sóz sóıledi.
«Qazir Ázerbaıjan kóptegen aýqymdy jarysty joǵary deńgeıde ótkizetin elge aınalyp úlgerdi. Aldaǵy kúnderi biz munda oq atý, stend atý syndy barlyq baǵdarlamadaǵy úzdikterdi birge anyqtaımyz. Parıj Olımpıadasyna deıin bir ǵana jyl qaldy. Sol sebepti osy álem chempıonatynda joldamanyń basym bóligi sarapqa salynady», dedi Lýchano Rossı.
Osydan keıin tóreshiler men sportshylardyń ant berý rásimi ótip, is-shara túrli mádenı qoıylymdarmen jalǵasty.
Qazaqstan quramasy atalǵan básekede barlyq sanatta júldege talasady. Qurama sapynda barlyǵy 26 sportshy bar. Olar:
Tapansha – Eldar Imanqulov, Valerıı Rahımjan, Maksım Mazepa, Nıkıta Chırıýkın, Rýslan Iýnýsmetov, Artemıı Kabakov, Alekseı Lotarev, Sáýle Álimbek, Olga Aksenova, Irına Iýnýsmetova, Valerııa Popelova;
Vıntovka – Islam Satpaev, Iýrıı Iýrkov, Konstantın Malınovskıı, Ilıa Fedın, Arına Altýhova, Elızaveta Bezrýkova, Aleksandra Le, Anastasııa Grıgoreva;
Jyljymaly nysana – Baqtııar Ibraev, Andreı Hýdıakov, Asadbek Nazırkýlev, Ilıa Zoteev, Fatıma Irnazarova, Zýhra Irnazarova, Aleksandra Sadýakasova.
Ulttyq qurama kóshbasshysynyń biri Islam Satpaev daıyndyq josparǵa sáıkes ótkenin, Bakýde osyǵan deıin jarysqa qatysqandyqtan qıyndyq bolmaıtynyn atap ótti.
«Álem chempıonatynyń qarsańynda osynda Gabala qalasynda oqý- jattyǵý jıynyn ótkizdik. Jyl basynan beri jarystar jetkilikti boldy. Indonezııa men Ázerbaıjandaǵy Álem Kýbogy kezeńinde jaqsy nátıje kórsete aldyq dep oılaımyn. Sosyn, elimizde Spartakıadaǵa qatysqan soń Qytaıdaǵy jazǵy Ýnıversıadada óner kórsettik. Osy jarystardan júldesiz qaıtqan joqpyz. Álem chempıonatyna saqadaı saımyz. Sátin salyp, Olımpıada lısenzııasyn kóbirek alýdy qalaımyz», dedi ol Sportty damytý dıreksııasynyń baspasóz qyzmetine bergen suhbatynda.
Aıta ketelik, Bakýdaǵy doda 1 qyrkúıekte máresine jetedi. Osy aralyqta 101 memleketten kelgen 1200-den astam mergen baq synaıdy. Baıraqty báseke kezinde kelesi jyly Fransııa astanasynda bolatyn Olımpıadanyń 48 joldamasy sarapqa salynady.