Qoǵamnyń tynys-tirshiligine beıjaı qaramaıtyn, bir muqtajdyń kádesine jarasaq degen aqedil nıettegi pedagogter «Júrekten júrekke» atty eriktiler qozǵalysyn quryp, talaı ıgilikti iske uıytqy bolyp keledi. Almaty Memlekettik bıznes kolledji janynan qurylǵan qozǵalys balalar úıinde birneshe is-shara uıymdastyryp, qalanyń ekologııalyq máselesin retteýge de belsendi atsalysyp júr.
Bul qozǵalystyń bastamalaryn atalǵan oqý orny dırektorynyń tárbıe isi jónindegi orynbasary Aıdar Kúntýbaı men Nazgúl Butabaeva, Baıan Shoqanova, Úmit Tursynbekqyzy, Danagúl Chaınýsıpova, Qazyna Shókenova syndy oqytýshylar uıymdastyrady.
Eriktiler buǵan deıin №1 oblystyq balalar úıinde kóptegen is-shara ótkizip, balalar men mekeme qyzmetkerlerine úlken qýanysh syılady. Sondaı-aq qoqys jınaý sııaqty aksııalardy da ótkizip, azamattardyń ekologııalyq mádenıetin qalyptastyrýǵa úles qosyp júr. Sonymen qatar salamatty ómir saltyn ustanýǵa shaqyratyn sporttyq volonterlik jumystardy belsendi túrde júrgizip keledi.
Muǵalimderden quralǵan «Júrekten júrekke» eriktiler qozǵalysynyń taǵy bir ereksheligi – úı-kúısiz, qańǵybas janýarlarǵa kómektesýden de qalys qalmaıdy. Kún saıyn myńdaǵan janýar kóshe kezip, ýaqytsha ustaý ızolıatoryna qamalady. Osy rette olar kópshilikti janýarlarǵa jaýapkershilikpen qaraýǵa shaqyryp, qorǵansyz tirshilik ıeleriniń qatygez ortanyń qurbanyna aınalýdan qutqarady.
Shákirt tárbıeleıtin mamandardyń osyndaı ıgi isteri – jastarǵa ónege. Qalaı degenmen jaqsylyq jasap úlgi kórsetken bul qozǵalystyń qolǵa alǵan jumysy jalǵasady dep senemiz.
Arýjan Talapqyzy,
M.О́temisov atyndaǵy Batys Qazaqstan ýnıversıtetiniń 4-kýrs stýdenti