О́tken aptada fýtboldan Eýrolıga oıyndary ótip, sol jarysta baq synaǵan qazaqstandyq úsh komandanyń ekeýi jeńilis tapsa, bireýi jeńiske jetti. Eń ókinishtisi, elimizdiń eń úzdik ujymy – «Astana» ÝEFA-nyń Eýropa lıgasynda óz qarsylastaryna oısyraı utyldy.
«Astananyń» tas-talqanyn shyǵardy
О́z elimizde ótken oıynda «Astana» Bolgarııanyń «Lýdogoresin» 2:1 esebimen utqan edi. Qarymta matchta jerlesterimiz jaqsy oıyn órnegin kórsetedi dep úmittendik. О́ıtkeni byltyrǵy maýsymda el chempıony atanǵan elordalyq komandanyń sapynda myqty oıynshylar jeterlik. Onyń ústine jyl saıyn olar Eýrolıga týrnırlerine qatysyp, mol tájirıbe jınady. О́kinishke qaraı, bári biz oılaǵandaı bolmady. Razgradtaǵy básekede alań ıeleri «Astananyń» tas-talqanyn shyǵardy.
Kezdesýdiń 25-mınýtynda Bernard Tekpeteı esep ashsa, arada tórt mınýt ótkende Dembo Darbo tarazy basyn teńestirdi. Sol kezde «Ýh» dep bir tereń tynystadyq. Bul esep birinshi kezeńniń sońyna deıin saqtaldy. Alaıda úzilisten keıin «Astanany» múlde tanymaı qaldyq. Olardyń jıi qateleskeni bylaı tursyn, qarsylastarynyń qarqynyna ilese almaı, dármensiz kúı keshti. Bolgarııalyq fýtbolshylardyń qos qaptaldan qysqany jáne orta tustan uıymdastyrǵan shabýyldarynyń barlyǵy derlik nátıjeli boldy. Ekinshi kezeńde Bernard Tekpeteı (50-mınýt) ekinshi golyn soqsa, Iаkýb Petrovskı de (47 men 58-mınýttar) dýbldiń avtory atandy. Taǵy bir dopty Kırıl Despodov (67-mınýt) qaqpaǵa toǵytty. Sonymen qatar 76-mınýtta qonaqtardyń jartylaı qorǵaýshysy Dýshan Iovanchıchtiń alańnan qýylǵanyn da aıta ketken jón. Sóıtip, Razgradta 1:5 esebimen utylǵan «Astana» Eýropa lıgasyndaǵy joryǵyn aıaqtady. Endi olar Konferensııa lıgasynyń pleı-off kezeńinde baq synaıdy.
«Tobyldy» tobyqtan qaǵa almady
ÝEFA-nyń Konferenııa lıgasynyń úshinshi irikteý kezeńinde «Tobyl» men «Derrı Sıtı» ábden tiresti. Sodan bir apta buryn Qostanaıda ótken oıyn 1:0 esebimen alań ıeleriniń paıdasyna sheshilgen-di. Dýblındegi «Tallaht» stadıonynda matchtyń 15-mınýtynda Ýılıam Petchıng 11 metrlik núkteden nysanany dál kózdegende, kóńilimizdiń pás bolǵanyn nesine jasyraıyq. Alda áli 1 saǵat 15 mınýttaı ýaqyt bar. Sol ýaqyt aralyǵynda ırlandııalyq fýtbolshylar úzdiksiz shabýyldap, taǵy birneshe dopty torda toǵytatyn shyǵar dep oıladyq. Iá, solaıy solaı boldy. Biraq «Tobyldyń» oıynshylary salqynqandylyq tanytyp, sol esepti básekeniń sońyna deıin saqtap qaldy.
Qosymsha ýaqytta da jeńimpaz anyqtalmady. Sodan qos komanda penaltı soqty. Alǵashynda ortaǵa shyqqan tórt oıynshynyń barlyǵy da nysanany dál kózdedi. Olar – Patrık Makelenı, Brendon Kavana, Danıel Mýllen, Djordan Makeneff («Derrı Sıtı») jáne Ramazan Orazov, Mılıan Výkadınovıch, Evgenıı Shahov, Roman Asranqulov («Tobyl»). Odan keıin ırlandııalyq jartylaı qorǵaýshy Ben Doertı men qazaqstandyq komanda sapyndaǵy bosnııalyq legıoner Iovan Ilıch múlt ketti. Sońynda alań ıeleri qatarynan Kıan Kavana ǵana gol soqsa, «Tobyldyń» oıynshylary arasynan Boıan Mladjovıch pen Pavel Kıreenko mergendik tanytyp, óz komandalaryn pleı-off kezeńine alyp shyqty. Esep – 6:5.
«Sepsı» san soqtyryp ketti
Konferensııa kýbogine qatysqan taǵy bir komandamyz – «Aqtóbe» jankúıerler senimin aqtaı almady. Rýmynııanyń Sfyntý-Georg qalasynda jergilikti «Sepsımen» ótken alǵashqy match 1:1 esebimen teń aıaqtalǵanda, jerlesterimizdiń kelesi kezeńge shyǵatynyna eshkimniń kúmáni bolmady. Alaıda Andreı Karpovıchtiń shákirtteri bul dodaǵa daıar bolmaı shyqty.
Báseke barysynda qos komanda alma-kezek shabýyldar uıymdastyrǵanymen, bir saǵattan asa ýaqyt boıy olar bir-biriniń osal tusyn taba almady. Bul rette «Aqtóbeniń» oıynshylary belsendi kóringeni ras. Biraq esepti qonaqtar ashty. Kezdesýdiń 66-mınýtynda Nıkolae Peýn nysany dál kózdedi – 1:0. Sol esep oıynnyń sońyna deıin saqtaldy. Nátıjesinde, «Sepsı» atalǵan jarystyń pleı-offyna joldama alsa, «Aqtóbe» úshin Eýrolıgadaǵy joryq aıaqtaldy.