«Tasqyn» táýelsiz anımasııalyq stýdııasy túsirgen «Seriktes» fılmi tamyz aıynda Fransııanyń Kýrsel-sıýr-Mer qalasynda ótken halyqaralyq «Animated Expressions Expo» festıvalinde qysqametrajdy fılmder atalymynda birinshi oryndy jeńip aldy.
«Seriktes» – joǵalǵan alqany izdeıtin eki detektıv týraly fılm. Ideıa avtory jáne rejısseri 28 jastaǵy Ákejan Danııar. Alǵashqy eskızderdi rejısser QazUÝ Ulttyq óner ýnıversıtetinde oqyp júrgen kezinde salǵan. Ideıany «Tasqyn» anımasııalyq stýdııasyna jumysqa shaqyrylǵan soń júzege asyra aldy. Qysqametrajdy fılmdi shyǵarý úshin jarty jyl boıy 30 adamnan turatyn komanda – sýretshiler, anımatorlar, sıfrlyq sýretshiler, dybys mamandary jumys istedi.
«Seriktes» fılmi arnaıy festıval úshin túsirilgendikten, oǵan deıin daıyndalǵan mýltfılmder stıline uqsamaıdy. Ol dostyqqa, balalyq shaqqa jáne saǵynyshqa arnalǵan. Men meıirimdi jáne jarqyn týyndy jasaǵym keldi. Ár adamnyń balalyq shaǵynan jyly estelikteri bar. Sol ystyq kezeńdi fılmde sıpattaýǵa tyrystym. «Seriktes» kórermenniń jan dúnıesin qozǵaıdy dep oılaımyn», deıdi rejısser.
«Seriktestiń» bul jetistigi – «Tasqyn» stýdııasy úshin alǵashqy jeńis.
«Bizdiń stýdııamyzdyń mindeti – Qazaqstandaǵy anımasııany jańa deńgeıge kóterý. Osy janrdaǵy týyndylarǵa halqymyzdyń biregeı mádenı murasy men qundylyqtaryn engizý. Bizdiń mýltfılmder balalarǵa da, eresekterge de qyzyqty bolady dep esepteımiz. Al «Seriktes» talǵampaz qazaq kórermenderimen qatar basqa da halyqtardyń arasynda qyzyǵýshylyq týdyrdy», deıdi stýdııa prodıýseri Erkejan Bekjigitova.
«Tasqyn» táýelsiz anımasııalyq stýdııasy óz jumysyn 2022 jyly bastaǵan. Bir jyldyń ishinde stýdııa eldegi eń iri anımasııalyq birlestikterdiń birine aınaldy. Qazaqstannyń túkpir-túkpirinen jınalǵan daryndy jáne shyǵarmashyl 70 sýretshi stýdııanyń komandasyn qurǵan. Sıfrlyq sýretshilerdiń jastary 17 men 25 aralyǵynda. Stýdııanyń youtube arnasynan kórermen júregin jaýlap alǵan fılmderin taba alasyz.