Aıdynǵa shyqty kemeler

Paradty Qorǵanys mınıstri­niń birinshi orynbasary, general-leıtenant Marat Qusaıynov, Mańǵystaý oblysynyń ákimi Nurlan Noǵaev, Qarýly kúshterdiń ardagerleri baqylady. Áskerı-teńiz kúshteriniń bas qolbasshysy, kontr-admıral Sáken Bekjanov sherýdi basqardy.

Saltanatty sapta birinen keıin biri «Qazaqstan», «Oral», «Saryarqa», «Mańǵystaý» zy­my­randy-artıllerııalyq keme­leri, «Alataý» mına-tartqysh ke­mesi, «Tabıǵat» jáne «Jaıyq» gıdrografııalyq kemeleri júrdi. Jaǵalaý boıymen birdeı sap túze­gen teńizshiler kórermenderdi keme­ artıllerııasy qarýynyń dúr­kindetken daýysymen qarsy aldy.

Qala jaǵalaýynda sherýdiń qurlyqtaǵy bóligi ótti. Áskerı orkestrdiń únimen saltanatty marshpen Aqtaý garnızonynyń áskerı bólimderiniń saltanatty eseptoptary júrip ótti. Sony­men qatar kórermenderge áskerı kemelerdiń oq jaýdyrýy arqyly búrkemelep, teńiz jaǵalaýyna taktıkalyq desant túsirý kórinisi usynyldy. Naqtyraq aıtqanda, teńiz jaıaý áskerleri bıyl Áskerı-teńiz kúshteriniń qataryna qo­sylǵan «Qaısar» brondy jyl­dam qaıyǵynan desant túsirý tapsyrmasyn pysyqtady. Oqý-jaýyn­gerlik tapsyrmalardy oryn­daý barysynda teńiz jaıaý ás­ker­leriniń rotasy shartty qarsylas qolyndaǵy plasdarmdy qaıtardy.

Dástúr boıynsha áskerı qyz­metshiler Mańǵystaý jaýyn­gerlerin eske aldy. Máńgilik alaý­ǵa gúl shoqtaryn qoıý rási­mine Keńes Odaǵynyń Batyry, Halyq Qaharmany, ǵaryshker, avıasııa general-maıory Toqtar Áýbákirov, kontr-admıral Ratmır Komratov, Qarýly kúsh­terdiń ardagerleri qatysty.

Qarýly kúshter Ulttyq ás­kerı-patrıottyq ortalyǵynyń Ortalyq ansambli men Ortalyq áskerı orkestri daıyndaǵan me­re­kelik konsert qala turǵyn­daryna keremet kóńil kúı syıla­dy. Is-sharanyń eń qyzyqty sáti – Áskerı-teńiz kúshteriniń 30 jyldyq mereıtoıyna arnalǵan me­rekelik otshashý boldy.