Túrkistan oblysy Syrdarııa ózeninde 11 adam qaza tapqan oqıǵanyń mán-jaıy aıtyldy, dep jazady Egemen.kz.
Oblys ákimdiginiń baspasóz qyzmeti málimetinshe, 21 tamyzda saǵat 18:00 shamasynda turǵyndardan adamdar sýǵa batyp ketkeni týraly habarlama kelip túsken. Belgili bolǵandaı, shomylýǵa kelgen 20 adamnyń 11-i sýǵa batyp ketken. Olardyń beseýi bala, altaýy eresek adam.
«Olar - bir otbasynyń músheleri nemese tegi bir adamdar. Onda birneshe aǵaıyndylar jáne olardyń balalary boldy. Týystarynyń sózinshe, olar toıdan shyǵyp, ózen jaǵasynda demalýdy uıǵarǵan. Jaǵalaýdan birden tereń jeri bastalady. Shamasy bireýi sýǵa bata bastap, basqalary ony shyǵaryp alýǵa tyrysyp, batyp ketken. Aldyn ala aqparat boıynsha, olar bir-birin qutqarýǵa tyrysyp, batyp ketti. Tipti shomylýǵa úlgermegen, báriniń ústinde kıim boldy. Bul jer shomylýǵa arnalmaǵan», dedi Túrkistan oblysy ákimdiginiń baspasóz qyzmeti ókili.
Sýdan segiz adamnyń denesi shyǵarylǵan. Qalǵan úsheýin izdeý jumystary jalǵasyp jatyr. Oblystyq tótenshe jaǵdaılar departamenti janynan jedel shtab qurylyp, oqıǵa ornyna jiberilgen Otyrar aýdany ákimdiginiń, aýdandyq TJ, orman sharýashylyǵy bóliminiń qyzmetkerleri, eriktiler birden izdestirý sharalaryna kirisken.
Túrkistan oblysy TJD baspasóz qyzmetiniń málimetinshe, oqıǵa ornyna 144 adam, 16 tehnıka, 6 júzý quraly jáne dron jumyldyrylǵan.