26 tamyz ben 17 qyrkúıek aralyǵynda velosporttaǵy eń beldi jarystardyń biri – «Ispanııa Výeltasy» kópkúndiginiń jalaýy jelbireıdi.
Pıreneı túbegindegi jáne Andorra men Fransııa aýmaqtarynda ótetin jarys Barselonadan bastaý alyp, Madrıdte óz máresine jetedi. 23 táýlik aralyǵynda veloshabandozdar 3156,5 shaqyrymdy júrip ótýge tıis. Bıylǵy jarysta 22 komanda baq synaıdy. Olardyń qatarynda «Astana» da bar. Elimiz veloklýbynyń sapynda Davıd de la Krýs (Ispanııa), Lýıs Leon Sanches (Ispanııa), Haver Romo (Ispanııa), Djo Dombrovskı (AQSh), Samýele Battıstella (Italııa), Fabıo Fellıne (Italııa), Andreı Zeıs (Qazaqstan) jáne Vadım Pronskıı (Qazaqstan) óner kórsetedi.
Esterińizge sala keteıik, byltyr Ispanııamen qosa, Nıderland pen Belgııa aýmaqtarynda uıymdastyrylǵan jarys «Soudal Quick-Step» klýbynyń serkesi, 22 jastaǵy belgııalyq Remko Evenepýldiń jeńisimen aıaqtaldy.