Premer-mınıstrdiń orynbasary – eńbek jáne halyqty áleýmettik qorǵaý mınıstri, V Dúnıejúzilik kóshpendiler oıyndaryna daıyndyq jónindegi uıymdastyrý komıtetiniń tóraǵasy Tamara Dúısenova atalǵan oıyndarǵa daıyndyq boıynsha otyrys ótkizdi, dep habarlaıdy Egemen.kz Úkimettiń baspasóz qyzmetine silteme jasap.
Otyrysta Astana qalasy ákimdigi men Mádenıet jáne sport mınıstrliginiń Astananyń sport ınfraqurylymynyń sharaǵa daıyndyq deńgeıi týraly aqparaty tyńdaldy.
Otyrys barysynda T.Dúısenova V Dúnıejúzilik kóshpendiler oıyndary aıasynda jarystar ótkizý úshin Astana qalasynda qoldanystaǵy sport nysandary paıdalanylatynyn, arnaıy jańa nysandar salynbaıtynyn atap ótti.
Elorda ákimdiginiń derekterine sáıkes osy halyqaralyq is-sharaǵa daıyndyq aıasynda «Astana Arena» stadıony, «Alaý» muz saraıyna jóndeý júrgiziledi. Sondaı-aq bıýdjetten tys qarajat esebinen elordalyq «Qazanat» ıppodromyn rekonstrýksııalaý josparlanǵan.
Eske salaıyq, 2024 jyly V Dúnıejúzilik kóshpendiler oıyndaryn ótkizý estafetasy Qazaqstanǵa berildi. Dúnıejúzilik kóshpendiler oıyndary (World Nomad Games) – etnıkalyq sport túrleri boıynsha halyqaralyq jarys. Oǵan Ortalyq Azııanyń tarıh boıynsha kóshpeli halyqtarynyń ulttyq oıyndary negiz boldy.