Prezıdentke Mańǵystaý oblysynyń bıylǵy 7 aıdaǵy áleýmettik-ekonomıkalyq damý qorytyndylary jáne aldaǵy josparlary baıandaldy, dep habarlaıdy Egemen.kz Aqordanyń baspasóz qyzmetine silteme jasap.
Mańǵystaý oblysynyń ákimi Nurlan Noǵaev Memleket basshysyna esepti kezeń ishinde óńirde jalpy somasy 5,3 mıllıard teńge bolatyn 6 ınvestısııalyq joba iske qosylǵanyn aıtty. Jalpy, qańtar-shilde aılarynda óńirdiń negizgi kapıtalyna baǵyttalǵan ınvestısııa kólemi 523 mıllıard teńgeni qurady.
Sonymen qatar Memleket basshysyna aýyzsý tapshylyǵyn sheshýge qatysty tapsyrmasynyń oryndalý barysy týraly málimet berildi. Bul máseleni kezeń-kezeńimen sheshý úshin oblysta 2025 jylǵa deıin 6 joba júzege asyrylady. Nátıjesinde tushytylǵan sýdyń kólemin 146 myń tekshe metrge deıin arttyrýǵa múmkindik týady.
Sondaı-aq Prezıdentke Aqtaý qalasynyń turǵyn úı-kommýnaldyq sharýashylyǵyn jetildirý jáne ınjenerlik ınfraqurylymyn qalypqa keltirý, Mańǵystaý atom energetıkalyq kombınatyna (MAEK) kúrdeli jóndeý júrgizý máseleleri jóninde baıandaldy.
MAEK-ke jóndeý jumystaryn júrgizý úshin bıyl 9,4 mıllıard teńge qarjy bólingen. Onyń ishinde 6,8 mıllıard teńge MAEK-tiń ınvestısııalyq baǵdarlamalary aıasynda, al 2,6 mıllıard teńge Mańǵystaý oblysy ákimdiginiń rezervinen bólindi. Buǵan qosa, Prezıdenttiń tapsyrmasy boıynsha Úkimet rezervinen qajetti qondyrǵylardy satyp alý úshin 4,9 mıllıard teńge qarjy qarastyryldy.
Kezdesý sońynda Memleket basshysy oblys ákimine Mańǵystaý óńiri energetıkalyq júıesiniń úzdiksiz jumys isteýin qamtamasyz etýdi jáne óńirdiń áleýmettik-ekonomıkalyq damýynyń keshendi jospary aıasyndaǵy mindetterdi iske asyrýdy tapsyrdy.