Prezıdent BUU Bas hatshysynyń arnaıy ókili, Ortalyq Azııa boıynsha preventıvti dıplomatııa jónindegi óńirlik ortalyqtyń basshysy Kaha Imnadzeni qabyldady. Memleket basshysy Kaha Imnadzeni joǵary laýazymǵa taǵaıyndalýymen quttyqtap, onyń Ortalyq Azııa memleketteri men BUU arasyndaǵy yntymaqtastyqty damytýǵa eleýli úles qosatynyna senim bildirdi, dep habarlaıdy Egemen.kz Aqordanyń baspasóz qyzmetine silteme jasap.
Prezıdent Ortalyq Azııa boıynsha preventıvti dıplomatııa jónindegi óńirlik ortalyqtyń mańyzdylyǵy men qajettigin atap ótip, onyń aımaqtaǵy ornyqty ósimdi qamtamasyz etý, turaqtylyq pen qaýipsizdikti nyǵaıtý isine odan ári qoldaý kórsetýge daıyn ekenin jetkizdi.
Kaha Imnadze ortalyq qyzmetine qoldaý kórsetkeni úshin Qasym-Jomart Toqaevqa alǵys aıtyp, Qazaqstannyń óńirdegi beıbitshilikti nyǵaıtý jáne dıalogty ilgeriletý isine qosqan eleýli úlesin atap ótti.
Kaha Imnadze óńir elderiniń ózara jemisti yntymaqtastyǵyna jan-jaqty yqpal etýge tyrysatynyn málimdedi.
Sonymen qatar kezdesý barysynda Aýǵanstandaǵy qazirgi jaǵdaı talqylandy.