Tennısten elimizdiń erler arasyndaǵy ekinshi, álemniń 128-raketkasy Tımofeı Skatov óz karerasynda alǵash ret «Úlken dýlyǵa» sanatyndaǵy AQSh ashyq birinshiliginiń negizgi kezeńine joldama aldy.
US Open týrnıriniń irikteý saıystarynda baq synaǵan 22 jastaǵy otandasymyz alǵashqy básekesinde japonııalyq Kaıtı Ýtıdany eki sette 6:2, 6:2 esebimen tize búktirse, ekinshi matchta ıtalııalyq Raýl Brankachchıony jarys jolynan yǵystyrdy – 6:4, 6:3. Al negizgi kezeńge joldama beretin kezdesýde ATR 250 Astana Open 2021 týrnıriniń fınalısi aýstralııalyq Djeıms Dakvortpen sheberlik baıqasyp, 6:2, 6:2 esebimen jeńiske jetti. Osylaısha, Skatov óz sporttyq jolynda alǵash ret AQSh ashyq chempıonatynda oınaıtyn boldy. Onyń qarsylasy keıin anyqtalady. О́kinishke qaraı, irikteý saıystarynda óner kórsetken taǵy bir otandasymyz Mıhaıl Kýkýshkın ekinshi kezdesýinde fransııalyq Enso Kokodan jeńilip qaldy – 6:7, 2:6.
Al búgin Nıý-Iorkte jalaýy jelbireıtin AQSh ashyq chempıonatynyń alǵashqy aınalymynda elimizdiń qos birinshi raketkalary – Elena Rybakına men Aleksandr Býblık alǵashqy oıyndaryn ótkizedi. Elena álemdik reıtıngte 37-orynda turǵan ýkraınalyq Marta Kostıýkpen kezdesse, Býblık birinshi aınalymda US Open 2020 týrnıriniń jeńimpazy Domınık Tımmen oınaıdy.