Elordanyń «Barys» hokkeı klýby Reseıdiń Omby qalasynda uıymdastyrylǵan «Blınov kýboginde» jeńiske jetti.
Qurlyqtyq hokkeı lıgasynyń jańa maýsymy aldyndaǵy mańyzdy týrnırde Andreı Skabelka shákirtteri sońǵy oıynda Nıjnekamskiniń «Neftehımık» klýbymen sheberlik baıqasyp, qarsylasyn 3:1 esebimen tize búktirdi. Elordalyq klýb sapynan oıyndaǵy úsh shaıbany da bıylǵy maýsymda «Barysqa» qaıta oralǵan shabýylshy Roman Starchenko soǵyp, het-trık avtory atandy.
Osylaısha, jerlesterimiz Ombydaǵy týrnırdiń barlyq matchynda qarsylastarynan basym túsip, «Blınov kýboginiń» bas júldesin ıelendi. Aıta keteıik, «Barys» QHL-diń 2023/2024 jylǵy maýsymyndaǵy alǵashqy oıynyn 2 qyrkúıek kúni óz aıdynynda О́feniń «Salavat Iýlaev» komandasymen ótkizedi.