Altaıdyń baýraıynda jazýshy Oralhan Bókeıdiń 80 jyldyq mereıtoıy dúrkirep ótti. Saltanatty is-shara Katonqaraǵaı aýylynda jazýshy atyndaǵy saıabaqtyń ashylýymen bastaldy. Bárinen buryn jınalǵan qaýym jazýshynyń týǵan aýyly Shyńǵystaıdaǵy mýzeı-úıiniń 20 jyldan soń qaıta ashylǵanyna qýandy.
Áýeli alys-jaqynnan kelgen jazýshynyń oqyrmandary, týǵan-týystary saıabaqtaǵy Oralhan Bókeıdiń keýde músinine gúl shoqtaryn qoıyp, jazýshy rýhyna qurmet kórsetti. Osy oraıda qalamgerdiń qaryndasy Ǵalııa Bókeı jazýshynyń atyna Astanadan kóshe beriletinin aıtyp, mereıimizdi ósirdi. Budan keıin jınalǵan jurt Shyńǵystaıǵa qaraı aǵyldy. Munda jazýshynyń mýzeı-úıi qaıta jóndeýden ótip, aqsaqaldardyń batasymen esigin aıqara ashty. Jazýshy ósip-óngen qara shańyraqqa engen bette sol zamanǵa tap bolǵandaı kúı keshedi ekensiz. Anasy Kúlııa men ákesi Bókeıdiń jatyn bólmesindegi jıhazdar sonaý zamannan qaz-qalpynda turǵandaı. Ortańǵy bólmede Oralhannyń ózi paıdalanǵan zattary toptastyrylǵan. Sondaı-aq 80 jyldyqqa oraı ótken sýretshiler plenerindegi kartınalar da mýzeı qoryn tolyqtyratyn bolady.
Mereıtoıǵa qurmetti qonaq retinde shaqyrylǵan Oralhan Bókeıdiń jıeni Klara Nurjaqypqyzy jınalǵan qaýymdy qalamgerdiń mereıtoıymen quttyqtap, mýzeı-úıge Oralhannyń jeke shapany men 1964 jyly túsken sýretin tabystady. Sonymen qatar kórshiles Zaısan, Samar, Glýbokoe aýdandarynan kelgen delegasııa da mýzeı qoryna syılyqtaryn tartý etti.
Qýanysh ústine qýanysh. Mýzeıdiń aýlasynda jazýshynyń jańa bıýsti ashyldy. Ádette eskertkishterge syn-eskertpe jıi aıtylar edi ǵoı. Al bul jolǵy jazýshy músinin jasamas buryn sýretshiler keńesi qurylyp, ábden pysyqtalǵan. «Kelisip pishilgen tonnyń kelte bolmasy» da sondyqtan ǵoı. Shyǵys Qazaqstan oblysy ákimi apparatynyń basshysy Erbol Nurǵalıev aıtqandaı, mundaı is-shara jazýshy esimi jastardyń sanasynda saqtalyp qalýy úshin qajet. Iá, qalyń oqyrmany barda Oralhannyń esimi umytylmaq emes.
«Kazaq halqy Katonqaraǵaıdan shyqqan Qalıhan Ysqaq, Oralhan Bókeı, Dıdahmet Áshimhanuly syndy jazýshylardyń esimin umytpaýǵa tıis. Sondyqtan da osyndaı ıgi is-sharalar júıeli uıymdastyrylyp tursa eken», deıdi katonqaraǵaılyq jýrnalıst, aqyn Jánibek Qyzyr.
Aıta keterligi, bul kúni «Sosıalıstik Eńbek eri» Boshaı Kitappaevtyń týǵanyna 100 tolýyna jáne Oralhan Bókeıdiń 80 jyldyǵyna oraı Katonqaraǵaıda quran baǵyshtalyp, as berildi. Qurmetti qonaqtarǵa mereıtoılyq medaldar tabystaldy. Budan soń aýyzdyqtaryn qarsh-qarsh shaınaǵan júırikter jarys jolyna shyqty. Alǵashqy on shaqyrymdyq báıgede «Boshaıdyń úsh qarasyndaı» júldeli úsh oryndy da Kókpekti aýdanynyń sáıgúlikteri áketti. Al 25 shaqyrymdyq alamanda máre syzyǵyn Almatynyń tulpary birinshi bolyp kesip, ıesi sý jańa avtokóliktiń kiltin enshiledi. Ekinshi kólik Abaı oblysynyń shabandozyna buıyrdy.
Jaqsylardyń jaqsylyǵyn aıta keteıik, mereıtoıdyń bastan aıaq ótýine «Aýyldyq aımaqtardy turaqty damytý qory» demeýshilik etti.
– Oralhan Bókeıdiń 80 jyldyǵyna oraılastyrylǵan is-sharalar kásipkerlerdiń qoldaýymen ótti. Bıyl qorymyzǵa jergilikti kásipkerler 54 mln teńge kóleminde qarajat jınap, jazýshynyń úıin satyp alyp, murajaıǵa aınaldyrdy. Jazýshynyń mereıtoıy búgingi is-sharalarmen ǵana shektelmeıdi. 15 qyrkúıekte Astanada jazýshy shyǵarmashylyǵyna arnalǵan dóńgelek ústel ótip, «Áziret Sultan» meshitinde quran baǵyshtalady, as berý josparlanyp otyr. Odan keıin «Qar qyzy» pesasy sahnalanady. Al Almatyda Jazýshylar odaǵynyń halyqaralyq konferensııa uıymdastyryp, aqyndar aıtysy ótedi. Jazýshynyń mereıtoıyn abyroımen ótkizý biz úshin amanat», – deıdi «Aýyldyq aımaqtardy turaqty damytý» qorynyń basshysy Serik Júnisov.
Aýdan basshylyǵy mereıtoı sońyn qorytyndylaı kele, sahna tórinde oza shapqan shabandozdar men bilekti balýandarǵa júldelerin tabystady. Keshkilik Altaı baýraıynda jergilikti ónerpazdar ánnen shashý shashty, kúmbirletip kúı tókti. Aıtyp ótkendeı, qalamgerdiń qurmetine arnalǵan endigi is-sharalar Astana men Almatyda jalǵasyn tabady.
Shyǵys Qazaqstan oblysy,
Katonqaraǵaı aýdany