Bazalyq mólsherleme tómendedi

Jyl basynan beri ınflıasııalyq úderis­terdiń úzdiksiz baıaýlaýy baıqa­la­dy. Ol 2023 jyldyń shildesinde 14 paıyz boldy. Biraq shildede aılyq ınflıasııa ortasha tarıhı kórsetkishterden joǵary qalyptasa otyryp, 0,6 paıyzǵa deıin birshama jedeldedi.

«Bazalyq jáne maýsymdyq faktorlardy eskermeıtin ınflıasııa kórset­kish­teri bir deńgeıde tirkelip, baıaýlaǵan joq. Bul ishki suranystan qoldaý tap­qan baǵa ósýiniń turaqty sıpatyn kórsetedi. Taýarlar men qyzmetterdiń qu­­nyna áser etetin óndiristegi joǵary shy­ǵyndardyń saqtalýy – qosymsha faktor. Inflıasııalyq kútýler birshama tó­mendegenine qaramastan, joǵary qal­­pynda qaldy jáne jekelegen ta­ýar­lar naryǵyndaǵy jaǵdaıdyń ózgerýine sezimtal bolyp otyr. Syrt­qy faktorlardyń ınflıasııaǵa áseri bir­tindep tómendep keledi. Biraq jaǵ­daı aldyńǵy boljamdyq raýndpen salystyrǵanda qolaısyzdaý bola bas­tady. Kóptegen elde baǵalardyń sha­ryq­taýy ortalyq bankter júrgizip otyr­ǵan saıasat nátıjesinde baıaýlap otyr. Bul rette bazalyq ınflıasııanyń ornyq­ty­ly­ǵy jáne ortamerzimdi perspektıvada targetterge qol jetkizbeýdiń joǵary yq­­tı­maldyǵy kóptegen ortalyq banktiń mól­­sherlemelerdi tómendetý sıklyn bas­taý merzimin keıinge jyljytty», dep túsindirdi Ulttyq bank.

Bazalyq ssenarııge sáıkes bıyl ınflıasııa – 10-12 paıyz, 2024 jyly – 7,5-9,5 paıyz, 2025 jyly 5,5-7,5 paıyz sheginde boljanǵan.

«Biz ótken jyly bazalyq mólsher­le­meni birtindep kótergen edik. Qazir sonyń ekonomıkaǵa qalaı áser etkenin kórip otyrmyz. Inflıasııanyń qarqyny birtindep baıaýlaı bastady. Bul bizdiń baǵalaý júrgizetin isimizge senimdilikti arttyryp, ınflıasııanyń turaqtalý úr­disin kúsheıte túsedi. Syrtqy orta de­zınflıasııalyq áserin saqtaýda. Álem­degi ortalyq bankterdiń aqsha-kredıt sharttaryn qatańdatýy, azyq-túlik ba­ǵa­synyń tómendeýi ishki baǵany ustap turýǵa yqpal etti. Alaıda ınflıasııa turaqtylyǵyn joǵaltpaǵandyqtan, da­my­ǵan elderde mólsherlemeni tómen­dete bastaý merzimi keıinge qalyp qo­­ıyp otyr. Reseıde rýbl baǵamy álsirep, tutynýshylyq suranys artýy­nan ınflıasııalyq qysymnyń kúsheıe túskeni baıqala bastady», deıdi UB tóraǵasy Ǵalymjan Pirmatov.

Onyń aıtýynsha, bazalyq mólsher­le­me­ni tómendetýge myna faktorlar áser etti: bes aı qatarynan ınflıasııanyń tómendep kele jatqany, ekonomıkadaǵy negizgi salalardyń ósýine baılanysty ishki ekonomıkada iskerlik belsendiliktiń úzdiksiz artýy jáne syrtqy ekonomıkada jahandyq ınflıasııanyń baıaýlaý úrdi­si­niń jalǵasýy.

Qazirgi maqsat – 2025 jyldyń sońyna taman 5 paıyz ınflıasııa nysanasyna qol jetkizý. Ǵ.Pirmatovtyń aıtýynsha, bul maqsatqa jetý úshin barynsha qatań aqsha-kredıt saıasatyn saqtaýǵa daıyn bolý kerek.

«Bul rette fıskaldyq saıasat, janar-jaǵarmaı baǵasyn jáne turǵyn úı-kommý­naldyq qyzmetteriniń tarıfterin belgileý salasynda qabyldanyp jatqan sharalar, ekonomıkadaǵy tutyný men únemdeý arasyndaǵy balansy barynsha mańyzdy bolady. Naqty ınflıasııanyń dınamıkasy men onyń turaqty bóliginiń belsendi baıaýlaýy bizdiń kútýlerimizge sáıkes kelgen kezde Ulttyq bank baza­lyq mólsherlemeni birtindep jáne baıyppen tómendetý saıasatyn jal­ǵas­tyrady. Buǵan múmkindik bar, biraq proınflıasııalyq táýekelderdi, onyń ishinde fıskaldyq qoldaýdy eskersek, ol shekteýli jáne aldaǵy sheshimderdi baıyppen qabyldaýdy talap etedi. Budan ári kelip túsetin derekter men ınflıasııa táýekelderine baılanys­ty bazalyq mólsherlemeni tómendetý toqtata turýdy qajet etýi múmkin», dedi ol.