28 tamyz – qazaq rýhanııatynyń qara nary О́zbekáli Jánibekovtyń týǵan kúni. Osy oraıda Túrkistan qalasynda «Áziret Sultan» memlekettik tarıhı-mádenı mýzeı-qoryǵynyń uıymdastyrýymen «О́zbekáli Jánibekov taǵylymy» atty kórme ashyldy, dep habarlaıdy Egemen.kz Túrkistan oblysy ákiminiń baspasóz qyzmetine silteme jasap.
Kórnekti memleket jáne qoǵam qaıratkeri, belgili etnograf, tarıhshy ǵylym О́zbekáli Jánibekovke arnalǵan bıylǵy jyly on besinshi márte ótip jatqan kórmeniń ashylý saltanatyna Túrkistan qalasy ákiminiń orynbasary Erlan Kúzembaev, qalalyq máslıhattyń apparat basshysy Janbolat Ibragımov, elimizge belgili ǵalymdar, kitaphana, JOO men jalpy orta, salalyq mektepter men ortalyq uıym basshylary, qyzmetkerleri jáne BAQ ókilderi qatysty.
«Áziret Sultan» mýzeı-qoryǵynyń dırektory Maýlen Sadyqbekov qaıratker tulǵanyń qazaq eli úshin ásirese Qoja Ahmet Iаsaýı kesenesin saqtaý, qalpyna keltirý, mýzeılendirý boıynsha atqarǵan eńbegi ushan-teńiz ekendigin jetkizdi. Sondaı-aq bıylǵy kórmeniń erekshelikterin atap ótti.
«Tar zaman, taıǵaq keshý dáýiriniń ózinde mansabyn ǵana emes, basyn da qaterge tige júrip, ulty úshin uly isterdi atqaryp ketken «Rýh sardary» atanǵan qazaq rýhanııatynyń qara nary О́zbekáli Jánibekovtyń 28 tamyz – týǵan kúni. Osy datany mereke retinde atap ótýdi dástúrge aınaldyrdyq. Mádenıet mınıstri bolyp otyrǵan tusynda birtýar azamat «Áziret Sultan» mýzeı-qoryq qoryna ótkizgen jádigerleri men óz kitaptarynda atap kórsetken elimizge eńbegi sińgen azamattardyń da jeke zattarynyń kórmege qoıylýy edi. Ol – KSRO Joǵarǵy Keńesiniń sheshimimen KSRO-nyń «Halyq muǵalimi» qurmetti ataǵymen marapattalǵan atyraýlyq azamat Qusnı Aıtqalıev pen elimizge eńbegi sińgen qurylysshy, restavrator Arynbek Orazbaıuly. Atalǵan kórme kelýshilerge bir aı qyzmet kórsetedi», dedi mýzeı dırektory.
Ashylý saltanatynan soń jınalǵan kópshilik «О́zbekáli Jánibekov taǵylymy» kórmesin tamashalady. Shara barysynda mýzeı-qoryq dırektory atalǵan azamattardyń urpaqtaryna kórme uıymdastyrý jumystaryna atsalysqany úshin alǵys bildirip, syı-sııapat jasady.
Budan soń Túrkistan qalasy ardagerler keńesiniń tóraǵasy Jarqynbek Qulbaıynbetov, Túrkistan qalasynyń qurmetti azamaty, ardager aqyn Nurmahan Nazarov, Túrkistan qalasynyń qurmetti azamaty Maqsut Atambaev, tulǵanyń qaryndasy Aıǵanym Abanqyzy, kezinde ózi jumysqa qabyldaǵan, birge qyzmettes bolǵan Rahııa Súleımenqyzy, elimizge eńbegi sińgen qurylysshy, restavrator Arynbek Orazbaıulynyń uly Arystanbek Arynbekuly sóz alyp, О́.Jánibekov jaıly estelik pikirlerin aıtty.