Bul kúnderi Ázerbaıjannyń bas shahary – Bakýde nysana kózdeýden 53-álem chempıonaty ótip jatqany belgili. Baıraqty dodanyń kezekti jarys kúninde jerlesterimiz úzdik nátıje kórsetip, álem chempıonatyndaǵy tarıhı júldege qol jetkizdi.
Sportty damytý dıreksııasy baspasóz qyzmetiniń málimeti boıynsha, áıelder arasynda 10 metrden jyljymaly nysana kózdeýdiń fınalyna eki jerlesimiz – Zýhra Irnazarova men Aleksandra Sádýaqasova shyǵyp, bas júldeni sarapqa saldy. Asa tartysty ótken fınaldyq saıysta Zýhra otandasy Aleksandradan 6:3 esebimen basym túsip, álem chempıony atandy. Al qola júlde ýkraınalyq Galına Avramenkoǵa buıyrdy.
Buǵan deıingi eresekter arasyndaǵy álemdik dodada el sportshylary birde-bir júlde almaǵan edi. Barlyq jetistik tek jasóspirimder men jastar deńgeıinde tirkelgen. Al keshe el qorjynyna birden qos medal tústi. Bakýde kúmis júldege ıe bolǵan Aleksandra Sádýaqasova byltyr Fransııada ótken jastar arasyndaǵy álem chempıonatynda top jarǵan bolatyn.
Qazirgi tańda Qazaqstan quramasynyń enshisinde 3 júlde bar.