Konstıtýsııa kúni qarsańynda Qazaqstan Prezıdentiniń Arhıvi erekshe joba uıymdastyrdy. Almaty qalasynyń oqýshylaryna arhıv qujattaryn paıdalaný jóninde sheberlik synyby ótip, sonyń nátıjesinde Arhıvte balalar ózderi daıyndaǵan kitap, sýret, qujattyq kórmelerdi tanystyrdy.
Is-sharany Prezıdent Arhıviniń dırektory Álııa Mustafına ashyp, oqýshylardy Konstıtýsııa kúnimen quttyqtady. Ol Konstıtýsııa memleketimizdiń basty zańy ekenin atap ótip, sonyń negizinde eldiń memlekettik, saıası, qoǵamdyq, ekonomıkalyq tetikteri qalyptasatynyn jetkizdi. Sonymen qatar ol balalarǵa 1995 jyly 30 tamyz kúni qabyldanǵan qazirgi qoldanystaǵy Konstıtýsııa Prezıdent Arhıvinde memlekettik saqtaýda ekenin aıtyp, búgin olar úshin tarıhı kún ekenin jetkizdi.
Oqýshylardyń bul kórmege úlken jaýapkershilikpen, izdenispen kelgeni baıqalady. Buǵan deıin olar arnaıy sheberlik sabaǵy kezinde Konstıtýsııa kúnine oraı qujattyq kórmege qandaı isterdi usynatynyn, kitap kórmesine qandaı basylymdardy qoıatynyn jáne sýret kórmesine ilinetin shyǵarmalardy Arhıv qyzmetkerlerimen birge tańdasyp, úlken qyzyǵýshylyqpen jumys istedi. Nátıjesinde, qujattyq kórmeni №195 jalpy bilim beretin mekteptiń oqýshysy Ámına Tursynjan, №35 mektep-gımnazııanyń 9-synyp oqýshysy Adııa Serjan, 125 High School mektebiniń 11-synyp oqýshysy Amıra Ilıas tanystyrdy, al kitap kórmesi týraly №195 jalpy bilim beretin mekteptiń oqýshysy Mahabbat Muqan baıandady.
«Meniń Otanym – meniń bolashaǵym» taqyrybynda sýret kórmesine oqýshylardan kelgen 30-ǵa jýyq shyǵarma qoıylyp, ol jóninde № 204 mekteptiń tarıh pániniń muǵalimi Aqerke Nurjanqyzy aıtyp berdi. Ol óz sózinde kórmege kelip túsken sýretterdiń barlyǵy balalardyń týǵan jerine degen mahabbatyn, bolashaqqa degen senimin kórsetkenin atap ótti.
«Sheberlik sabaǵy kezinde Konstıtýsııaǵa qatysty kitaptar, qujattarmen tanystyq. Biz Konstıtýsııanyń túpnusqasyn kórdik, bul biz úshin úlken qýanysh. Sebebi elimizdiń Ata Zańynyń qalaı jazylǵanyn, qalaı daıyndalǵanyn, qalaı qabyldanǵanynan habardar boldyq. Bul is-shara tarıhymyzdy bilip, ony qurmetteý kerek ekenimizdi kórsetti», deıdi №25 mekteptiń oqýshysy Radmıla Anısımova.
Jastarǵa patrıottyq tárbıe berýge, eliniń tarıhyn arhıv qujattary negizinde tereńirek oqyp-bilýge baǵyttalǵan «Bolashaq arhıvshi» jobasyn Prezıdent Arhıvi 2022 jyly elimizde jarııalanǵan Balalar jyly aıasynda uıymdastyrǵan. Byltyrǵy is-sharada oqýshylar arhıvtiń qyzmeti jáne mindetterimen erkin formatta tanysyp, arhıvshilerdiń kúndelikti jumysyn kórgen edi. Sonymen qatar balalar Prezıdent Arhıviniń qujattary saqtalǵan zerthanalyq korpýsqa ekskýrsııa jasap, qujattardy tigý, restavrasııalaý jáne sıfrlandyrý sııaqty jumys túrleri men basqa da qyzmetteri boıynsha sheberlik saǵattaryn ótkizdi. Isterdi qorapqa ornalastyrý, keıin isterdi nómirleý, qujattardy zertteý, konvertterdi daıyndaý, sońynda arhıv qujattaryna mór basý syndy arhıv qyzmetkerleriniń kúndelikti jumystarymen tanysqan.
Jańashyl dástúr bıyl da jalǵasyn tapty. Balalar oqý jylynyń aldynda Arhıvke kelip, Konstıtýsııa kúnin erekshe formatta atap ótti. Is-shara sońynda balalarǵa «Bolashaq arhıvshi» dıplomy tabystaldy. Arhıvte ótken aqparattyq-tanymdyq is-shara balalardyń jadynda uzaq saqtalady dep senemiz.