Túrkistan oblysynyń qurylǵanyna 5 jyl tolýyna oraı oblystyq mádenıet jáne týrızm basqarmasynyń uıymdastyrýymen «Visit Turkistan» ortalyǵy alańynda «Mýzeıler sherýi» keńeıtilgen kóshpeli kórmesi bastaldy, dep jazady Egemen.kz.
Bir ǵasyrdan astam tarıhy bar Túrkistan oblystyq tarıhı-ólketaný mýzeıi jádigerlerdi jınaqtap, saqtap, kópshilikke tanystyryp, keńinen nasıhattap kele jatyr.
Atalǵan kórme mýzeı qoryndaǵy jádigerler negizinde kıeli Túrkistannyń búgingi jańǵyrýy men jetistikterin halyqqa tanystyrý, nasıhattaý maqsatynda uıymdastyrylyp otyr.
Kórmeni oblystyq mádenıet jáne týrızm basqarmasynyń basshysy Ázimhan Qoılybaev ashyp berdi.
«Ulttyq rýhymyzdyń bir tarmaǵy ata-baba murasy men ónegesin keıingi urpaqqa tanytýda mýzeıdiń alatyn orny erekshe. О́tkenge qurmetpen qarap, búgingi kúndi qadirlep, keleshektiń qamyn oılaý – basty mindetimiz. Jalpy mýzeı – tarıhı-ǵylymı derekterdi, kóne zaman eskertkishterin, olardyń úlgi nusqalaryn, óner týyndylaryn, mádenı qundylyqtardy, muralardy zerttep jınaqtaýshy, saqtaýshy ári bul muralardy urpaqtan-urpaqqa jetkize otyryp, solardyń negizinde jastarǵa jalpy qoǵam múshelerine tálim-tárbıe, beretin mádenı jáne rýhanı mekeme. Sondyqtan eki aı boıy jalǵasatyn kóshpeli kórmeniń mańyzy zor», dedi basqarma basshysy.
Túrkistan oblysy ákimdiginiń baspasóz qyzmetiniń aqparatynsha osy kúnderi oblystaǵy mýzeı qorynda 170 myńnan astam rýhanı qundylyq saqtalǵan. Olardyń basym bóligin arheologııalyq, etnografııalyq ekspedısııalar nátıjesinde jınaqtalǵan biregeı jádigerler quraıdy. Atap aıtsaq, qazaqtyń sońǵy hany Keńesarynyń qylyshy, ataqty qazaq balýany Qajymuqannyń qara úıi, Uly kompozıtor Shámshiniń jeke zattary, Halyq qaharmandary, soǵys, tyl, eńbek ardagerleri, sport, bilim, mádenıet salasynyń damýyna óz úlesin qosqan azamattardyń da jetistigin aıqyndaıtyn jádigerler bar.
Keńeıtilgen kóshpeli kórmege Túrkistan oblysyndaǵy respýblıkalyq «Áziret Sultan», «Otyrar» memlekettik tarıhı-mádenı mýzeı-qoryqtarynyń, «Ordabasy» ulttyq tarıhı-mádenı qoryǵy, oblystyq mádenıet jáne týrızm basqarmasyna qarasty 24 mýzeı qatysady.
Aıta ketsek, mýzeıler sherýi 1 qyrkúıek pen 29 qazan aralyǵynda, aptanyń juma, senbi, jeksenbi kúnderi ótedi.