4 qyrkúıek keshki saǵat 22.00 shamasynda Temir aýdanynyń Keńqııaq aýyldyq aýrýhanasyna bas aınalý, loqsý belgilerimen bir mezgilde segiz adam jetkizilgen, dep habarlaıdy Egemen.kz.
Onyń tórteýi bes, toǵyz, on bir jastaǵy balalar bolsa, qalǵany eresekter. Jedel járdem qyzmetimen jetken naýqastardyń tórteýi birden aýrýhanaǵa jatqyzyldy. Dárigerler olardyń bári úıde gaz plıtasynan shyqqan gaz ıisinen ýlanǵandaryn anyqtady.
«Búgin tańerteń aýrýhanaǵa jatqyzylǵandar úılerine jiberildi», dedi oblystyq densaýlyq saqtaý basqarmasy basshysynyń orynbasary Bekbolat Izbasarov.
4 qyrkúıekte kúni boıy Keńqııaq, Shubarshı, Sarkól, Qumsaı, Qopa aýyldaryndaǵy aýylishilik gaz taratý jelilerine jóndeý jumystaryn júrgizýge baılanysty kúni boıy gaz berý toqtatylyp, keshki saǵat 20.30-da qosyldy. Bes aýyldyń turǵyndary keshe kúni boıy dalada jaǵymsyz gaz ıisi sezilgenine shaǵymdandy. Sol aýyldarǵa gaz taratýmen aınalysatyn «Tehnogaz» JShS basshysy Rýslan Ámirtaev kúni boıy osy aýyldarda aýylishilik gaz taratý jelisine jóndeý jumystary júrgizilgenin rastady. Al Keńqııaq eldimekeninde ýlanǵan adamdar gaz plıtasyn jaqqanda úı ishine taralǵan jaǵymsyz ıisten birden bastary aınalǵan.
«Keshe keshki saǵat 20.50-shamasynda Keńqııaq jáne Shubarshı eldi mekenderiniń turǵyndarynan gazdyń ıisi qatty shyǵyp jatqany jóninde shaǵym tústi. Gaz qubyry Jańajol gaz óńdeý zaýytynan Shubarshıdegi taratý jelisine kelgen soń ári qaraı Keńqııaq, Sarkól, Qumsaı, Qopa aýyldaryna barady. Al Jańajol gaz óńdeý zaýytynan qubyr Jaǵabulaq eldi mekenine tike barady. Bul aýyldan bizge shaǵym túsken joq», dedi Rýslan Ámirtaev.
Jańajol gaz óńdeý zaýytynan Temir aýdanynyń eldi mekenderine taraıtyn toraptyq jelisi «Intergaz-Ortalyq Azııa» kompanııasyna tıesili.
Keńqııaqtaǵy jaǵdaı úı ishinde turmystyq plıtalardy paıdalaný kezinde oryn alǵan jaǵdaı deıdi Ekologııa departamenti memlekettik ekologııalyq baqylaý bóliminiń basshysy Turar Qojanov. Onyń aıtýynsha, keshe «Qazgıdromettiń» Keńqııaqtaǵy beketine aýada zııandy zattardyń asyp túsýi týraly derek túsken joq. Ekologtar Keńqııaqtaǵy segiz adamnyń ýlaný jaǵdaıyna qubyrdaǵy metan gazyna qosylatyn odorant qospasynyń mólsherden kóp qosylýy sebep bolýy múmkin degen pikirde. Odorant adamdardyń ýlanýyn boldyrmaý úshin qubyrdaǵy metan gazyna qosylady. Qazir Keńqııaq pen Shubarshıdegi jaǵdaıǵa baılanysty Temir aýdanynda komıssııa quryldy.
Aqtóbe oblysy