Tilder kúni men Ahmet Baıtursynulynyń týǵan kúnine oraı elordadaǵy Qalamgerler alleıasyndaǵy Alash qaıratkerleri eskertkishine gúl shoǵyn qoıý rásimi ótti. Oǵan zııaly qaýym ókilderi men qala turǵyndary qatysty.
Astana qalalyq Tilderdi damytý jáne arhıv isi basqarmasy uıymdastyrǵan rýhanı is-sharada alǵashqy bolyp sóz alǵan akademık, Memlekettik syılyqtyń laýreaty Ǵarıfolla Esim ult ustazy týraly parasatty oı órbitti.
«Ahmet Baıtursynuly sekildi tulǵalar ǵasyrlarda sırek týady. Biz sondaı kemeńgeri bar baqytty halyqpyz. Onyń elimizge sińirgen qyzmeti ushan-teńiz. Sondyqtan da Aqańdy «Ulttyń rýhanı kósemi» dep aıtamyz. Qazaq jurty barda qazaq tili de jasaı beredi. Al tildi saqtaý – árbir qazaqtyń azamattyq boryshy», dedi ol.
Sondaı-aq Ǵylym jáne joǵary bilim mınıstrligi Til saıasaty komıtetiniń tóraǵasy Erbol Tileshov, alashtanýshy ǵalym, jazýshy Tursyn Jurtbaı, Astana qalasy Tilderdi damytý jáne arhıv isi basqarmasynyń basshysy Sáken Zııabekuly da jınalǵandardy Tilder merekesimen quttyqtap, Ahmet Baıtursynulynyń shyǵarmashylyq murasyn nasıhattaý týraly salmaqty sóz qozǵady.
Sonymen qatar is-shara barysynda Á.Mámbetov atyndaǵy memlekettik drama jáne komedııa teatrynyń ártisteri «Alash joly» qoıylymynan úzindi kórsetip, jas aqyndar Aqańa arnalǵan óleńderin oqydy.