Mine, kúzdiń alǵashqy aıy da bastaldy. Bul bir jaǵynan qońyr kúzdiń ǵana emes, elimizde jastardy áskerge shaqyrý naýqanynyń da bastalǵanyn bildiredi. Osynyń naqty aıǵaǵy - búgin Almaty qalasyndaǵy QR QM Áskerı-tehnıkalyq mektebiniń aldy qara-qurym jurtshylyqqa tolyp ketti. Jınalǵandar UQK Shekara qyzmetiniń sapyna alynǵan uldaryn áskerge shyǵaryp salyp jatyr.
Ata-analary qaqpanyń aldynda taǵatsyzdana tosqan jas jigitter Almaty oblysy boıynsha departamentiniń Raıymbek aýdany boıynsha shekara basqarmasyna barady. Ári qaraı, 40-qa jýyq áskerge shaqyrylýshy osyndaǵy kásiptik-tehnıkalyq jáne daıyndyq bóliminde áskerı ómirdiń alǵashqy álippesimen tanysady.
Bul týraly jas tolqynǵa birinshi bolyp, shekarashy ardagerlerdiń «Zastava tarlandary» respýblıkalyq qoǵamdyq birlestiginiń Almaty qalasyndaǵy fılıalynyń belsendi músheleriniń biri otstavkadaǵy polkovnık Q.Ertyshbaev jetkizdi. Sanaly ǵumyryn el shebine arnaǵan qart sardar áskerı ómirdiń tabaldyryǵynan alǵash ret attaǵaly turǵan bolashaq shekarashy sarbazdarǵa shekara týraly áriden áńgime qozǵap, Otanymyzdyń shetin qorǵaý – árbir azamat úshin abyroı ekenin qadap aıtty. Shekarashylardyń sapynda qyzmet atqarý – bolashaqta qandaı múmkindikter beretinine deıin egjeı-tegjeıli túsindirip ótti. Áskerden soń qyzmetin el shebinde kelisimshartpen jalǵastyrýǵa shaqyrdy.
Aǵa býyn men óskeleń urpaqtyń arasynda ótken áserli áńgime saǵatynan keıin jas jigitter áskerı-tehnıkalyq mektebiniń saptyq alańyna sapqa turdy.
Aldymen shekarashy ardager otstavkadaǵy polkovnık Q.Ertyshbaev sóıledi. Sardar qalyń qaýymǵa shekarashy ataný – ekiniń biriniń mańdaıyna jazyla bermeıtin baq ekenin aıtty. Al ata-analar atynan sóz sóılegen qart ana Nurqalıpa Tezekbaeva búgin áskerge attanǵaly turǵan jas jigitterdiń arasynda óziniń nemeresi de bar ekenin tolǵana jetkizgen soń qolyn jaıyp, ata batasyn berýge yńǵaılandy. «Batamenen el kógerer» demekshi, ózderiniń ulandarymen tezirek qaýyshyp, ystyq qushaqtaryna basýǵa asyǵyp turǵan jurtshylyq ta dúr ete túsken. Qoldaryn jaıyp, aq jaýlyqty keıýananyń aýzynan shyqqan árbir jaqsy sózdi yqylastana tyńdady.
Ári qaraı, bolashaq shekarashy sarbazdarǵa ata-ana, týǵandarymen qoshtasýǵa mursat berilýi muń eken, saptyq alań qýanyshty únderge tolyp ketti. Biz de osynaý sátti qalt jibergen joq edik. Birneshe kadr jasaǵan soń kópshiliktiń atynan tilek aıtyp, bozbalalarǵa bata bergen Nurqalıpa ájeıdi taýyp, suhbattasýǵa asyqtyq. Taptyq. Qasyna jaqyndap, ózimizdi tanystyrǵan soń:
– Nurqalıpa áje, jastarǵa aıtqan batańyzben kóptiń kóńilin shaıdaı ashtyńyz. Halyq rıza bolyp qaldy. Al endi nemereńizge aıtar tilegińizdi óz aýzyńyzdan estisek, - dep ótindik.
– Aınalaıyn, búgin áskerge nemeremdi shyǵaryp salýǵa ata-anasymen birge keldim. Bizdiń áýletten osy nemerem Islam birinshi bolyp, shekarashy atanǵaly tur. Aıtarym, barǵan jerińde qyzmettesterińniń aldy bol, Baýyrjan Momyshuly atańdaı batyl, jigerli, elin súıgen azamat atan. Ortamyzǵa aman-esen oral, biz seni kútemiz!, - dep meıirlene qaraǵan ájeı men júzi bal-bul jaınaǵan Islamnyń osynaý sátin dıktofonǵa ǵana emes, sýretke de túsirip úlgergenimizge qýandyq.
Mine, osylaısha, jastardy áskerge shaqyrý naýqany da qyzý bastalyp ketti. Alda olardy Ant qabyldaý kútip tur. Al oǵan deıin jas jigitter áskerı ómirdiń qyr-syrymen tanysyp, saptyq daıyndyqtaryn shyńdaıtyn bolady. Olaı bolsa, shekaramyzdyń bolashaq qorǵandaryna sáttilik tileımiz!
Tamara DÁÝLETBAEVA,
UQK Shekara qyzmetiniń zapastaǵy podpolkovnıgi