Qostanaı oblysy Arqalyq qalasyndaǵy Dala ólkesi tarıhy oblystyq mýzeıinde áıgili aqyn, Memlekettik syılyqtyń laýreaty Syrbaı Máýlenovtiń óz qolymen tapsyrǵan qoljazbalary, qalamgerlermen, oqyrmandarymen jazysqan hattary, tutynǵan zattary jáne kitaptary saqtalǵan. Solardyń ishinde tamyry bir týysqan ózbek halqynyń ardaqty aqynnyń ıyǵyna japqan shapany da bar.
Bul jádigerdiń tarıhy mynadaı. Jalpy, tabıǵatynan kópshil, aqjarqyn, kim-kimge bolsa da qushaǵy ashyq Syraǵań 1982 jyly О́zbekstanǵa shyǵarmashylyq saparmen barady. Sondaǵy oqyrmandarymen kezdesip, rýhanı kúsh jınaıdy. Qazaqtyń úlken aqyny keldi degennen keıin sol eldegi qalamdas dostary da ony quraq ushyp qarsy alady. Dál sol jyly alpysqa tolǵan arqaly aqynnyń ıyǵyna jón-joralǵymen shapan jaýyp, syı-qurmet kórsetedi. 1983 jyly týǵan jerine kelgende ol kisi álgi shapandy Arqalyq qalasyndaǵy mýzeıge óz qolymen tapsyrady. Qazir bul jádiger – osy murajaıdaǵy qundy dúnıeniń biri. Aqyn shapany óte jaqsy saqtalǵan.
Qazaq poezııasyna soǵystan keıin sony lep, jańa forma ákelgen Syrbaı Máýlenovtiń shyǵarmashylyǵyna ádebıet synshylary joǵary baǵa bergen. Syraǵańnyń aqyndyǵynan bólek, parasatty pýblısıstıkasy men aýdarmashylyǵy da bir tóbe. Ásirese aqyn shyǵarmashylyǵy týraly aýzy dýaly jazýshy Ábish Kekilbaıulynyń «Syrbaı – qazaqtyń ulttyq ádebıetiniń klassıgi. Klassık degen uǵym kez kelgen kisige aıtylýǵa tıisti emes. Kez kelgen daryndy, talantty adam klassık bola almaıdy. Tek qana ózi emes, búkil ulttyq ádebı bolmysqa óziniń izin, ónegesin tastaǵan adam ǵana osyndaı atqa laıyq bolýǵa tıisti. Bul retten kelsek, qazirgi qazaq poezııasynyń kósh basyndaǵy sarbazdary Syrbaıdy da aldymen aýyzǵa alady dep oılaımyn», dep aıtqan pikiri eshqashan mańyzyn joımaıdy.