Astanada onkologterdiń halyqaralyq ǵylymı-praktıkalyq konferensııasy bastaldy. Oǵan elimizdiń jáne О́zbekstan, Túrkııa, Reseı, Belarýs, Ulybrıtanııa, Germanııa, AQSh, Ońtústik Koreıa sekildi birneshe memlekettiń jetekshi mamandary qatysyp jatyr.
Resmı derekterge úńilsek, jyl saıyn elde onkologııalyq aýrýlardyń 37 myńnan asa jańa jaǵdaıy tirkelse, 13 myńnan astam adam qaıtys bolady eken. Qazirdiń ózinde onkopatologııasy bar 205 myńnan astam azamat esepte tur. Onkologııalyq aýrýdyń saldary bizdi ǵana emes, búkil álem halqyn alańdatyp otyr. Konferensııanyń ashylý saltanatynda Ulttyq ǵylymı onkologııa ortalyǵynyń basqarma tóraǵasy Sanjar Shalekenov osy jáne ózge de derekterdi ortaǵa saldy. Ǵylymı-praktıkalyq konferensııanyń mán-mańyzy týraly aıtty. Oraıly sátte jańadan boı kóterip jatqan onkologııalyq ortalyq jaıynda az-kem aqparat berdi.
– Densaýlyq saqtaý mınıstrligi bekitken jol kartasyna sáıkes Astana qalasynda Ulttyq ǵylymı onkologııa ortalyǵy jańa korpýsynyń qurylysy qyzý júrip jatyr. Qurylystyń birinshi kezeńi osy jyldyń jeltoqsan aıynda aıaqtalady dep josparlanyp otyr. Bul onkologııa salasyndaǵy ozyq ortalyqtardyń biri bolady. Onda qaterli isikterdi dıagnostıkalaý men emdeýdiń biregeı álemdik tehnologııalary qoldanylady, sondaı-aq ǵylymı zertteýler júrgizilip, ǵylymı-tehnıkalyq baǵdarlamalar iske asady, – dedi ol.
Onkologııalyq kómektiń qoljetimdigin arttyryp, sapasyn jaqsartýǵa kelgende birqatar mańyzdy másele áli de ózekti bolyp qala bermek. Densaýlyq saqtaý mınıstrligi onkologııalyq aýrýlarmen kúres jónindegi 2023-2027 jyldarǵa arnalǵan keshendi jospardyń jobasyn ázirledi. Bul jospar qaterli isikterdiń aýyrtpalyǵyn azaıtýǵa baǵyttalǵan. Statıstıka boıynsha keıingi jyldary qaterli isikten bolatyn ólim 15%-ǵa tómendegen. О́lim-jitim dereginde birinshi ókpe obyry (16,3%), ekinshi asqazan obyry (12,0%), úshinshi kolorektaldy obyr (10,6%) jáne tórtinshi sút bezi obyry (8,1%) tur. Sonymen qatar naýqastardyń 55,8 paıyzy eńbekke qabiletti jastaǵy (18-64 jas) toptan. Onkologııalyq qyzmettiń tıimdiligin sıpattaıtyn negizgi kórsetkishterdiń biri onkopatologııany erte anyqtaý. Ortalyq tóraǵasynyń klınıkalyq qyzmet jónindegi orynbasary Ádilbek Muqajanovtyń aıtýynsha, osy baǵyttaǵy jumystar úzilmegen.
– Elde onkologııalyq qyzmettiń qurylymyn damytý jáne jetildirý jumystary jalǵasyp keledi. Byltyr onkologııalyq kómektiń barlyq úsh deńgeıinde aıtarlyqtaı ózgeris boldy. Almaty, Astana, Aqtóbe, Semeı, Pavlodar, Aqtaý, О́skemen, Shymkent qalalaryndaǵy ortalyqtar jáne QazORǴZI joǵary tehnologııalyq radıasııalyq onkologııa ortalyǵy joǵary sanatty bilikti mamandardy tartyp, bazasyn zamanaýı tehnologııalyq quraldarmen jabdyqtaýda. Bul rasynda onkologııalyq aýrýlardy emdeýdiń joǵary tehnologııalyq ádisterin usynýǵa múmkindik beredi, – deıdi Á.Muqajanov.
Úsh kúnge jalǵasatyn ǵylymı-praktıkalyq konferensııada onkologııadaǵy ózekti máseleler túgel derlik qamtylady. Sonyń ishinde onkologııalyq aýrýlardy emdeýdegi jekelegen tásilder, radıasııalyq onkologııa, ıadrolyq medısına, pallıatıvtik kómek jáne basqa da baǵyttar qaralady.