Astanada Otbasy kúni merekesine oraı Kóktal saıabaǵynda júgirý marafony ótti, dep habarlaıdy Egemen.kz ákimdiktiń baspasóz qyzmetine silteme jasap.
Prezıdent Jarlyǵymen 2013 jyldan bastap ár qyrkúıektiń ekinshi jeksenbisinde Otbasy kúni merekesi atap ótiledi. Otbasylyq merekege oraı, alǵash ret «Koktal run» júgirý marafony uıymdastyrylyp, 3 jas ereksheligi boıynsha jeńimpazdar anyqtaldy.
«Búgingi is-sharamyzdy Otbasy kúnine oraı uıymdastyryp jatyrmyz. Osy maqsatta júgirý sportyn tańdadyq. Qysqa qashyqtyq bolǵandyqtan, kez kelgen turǵynnyń qatysý múmkindigi boldy. Saıysqa qalamyzdyń 200-den astam áýesqoı sportshysy qatysty. Otbasynda durys tárbıeni boıǵa sińirýimiz qajet. Júgirý – sonyń kórinisi. Ata-ananyń júgirgenin kórip, bala da salaýatty ómir saltyn ustanatyny anyq», dedi Saryarqa aýdanynyń mamany Damır Hısmatýllın.
Marafonda erler men áıelder 5 shaqyrymǵa, jasóspirim er balalar 2 shaqyrymǵa, qyzdar 1 shaqyrym qashyqtyqqa júgirdi. Jeńimpazdar men júldegerler dıplom, medal, baǵaly syılyqpen marapattaldy.