Úkimet qaýlylarymen Jańatas, Qarataý jáne Rıdder qalalaryn áleýmettik-ekonomıkalyq damytýdyń 2023-2027 jyldarǵa arnalǵan keshendi josparlary bekitildi, dep habarlaıdy Egemen.kz Úkimettiń baspasóz qyzmetine silteme jasap.
10 monoqalanyń áleýmettik-ekonomıkalyq jaǵdaıyn jaqsartý boıynsha naqty maqsattar belgilengen. Buǵan deıin Úkimet Altaı, Arqalyq, Balqash, Jitiqara, Lısakovsk, Serebrıansk jáne Stepnogorsk qalalary boıynsha keshendi josparlar qabyldaǵan edi.
10 keshendi jospar aıasynda 608 tarmaqtan turatyn is-sharalardy iske asyrý kózdelgen: densaýlyq saqtaý, bilim berý, sport, ınjenerlik ınfraqurylym, shaǵyn jáne orta bıznes, agroónerkásiptik keshen nysandaryn salý jáne jóndeý, zamanaýı jabdyqtardy satyp alý qarastyrylǵan. Osy maqsattarǵa 1,7 trln teńge josparlanǵan.
Mysaly, Jańatas qalasynda respýblıkalyq jáne jergilikti bıýdjet, sondaı-aq basqa da kózder esebinen 75 is-sharany iske asyrýǵa 3 mlrd teńgeden astam qarajat josparlanǵan. Qarataýda shamamen 50 mlrd teńge – bıýdjetten tys aqsha.
Arqalyq qalasynda Maıatas klasteriniń ken oryndaryna geologııalyq zertteý júrgizilgennen keıin taý-ken baıytý kombınatyn salý josparlanyp otyr. Quny 315 mlrd teńge bolatyn joba 1,2 myń jumys ornyn ashýǵa múmkindik beredi. Arqalyqty áleýmettik-ekonomıkalyq damytýdyń keshendi jospary Qostanaı oblysynyń Amangeldi jáne Jangeldi aýdandaryn damytý jónindegi is-sharalarmen tolyqtyrylǵan.
Balqash qalasynda Keshendi jospardy iske asyrý nátıjesinde ónerkásip óndirisiniń naqty kóleminiń ındeksi 8,5%-ǵa, óńdeýshi ónerkásibiniń úlesi 90%-dan kem emes ósip, negizgi kapıtalǵa salynǵan ınvestısııa 57 mlrd teńge bolady dep kútiledi. Shaǵyn jáne orta bıznes nysandarynyń sany, olardyń ónimderiniń kólemi jáne jumys oryndary biraz kóbeımek. Al áýejaı rekonstrýksııalanǵannan keıin týrıster aǵyny men iskerlik belsendilik 4 ese artady dep boljanyp otyr. 2027 jylǵa deıin atmosferaǵa taralatyn zııandy shyǵaryndylar 78,5 myń tonnadan 50,2 myń tonnaǵa deıin azaıady.
Aqmola oblysynyń Stepnogorsk qalasynda ónim shyǵarýdy 71 mlrd teńgeden 90 mlrd teńgege deıin, al aýyl sharýashylyǵyndaǵy IJО́ kólemin 10%-ǵa arttyrý kózdelip otyr. 3,5 myń jańa jumys orny qurylady. Medısına qyzmetkerleri jańa medısınalyq kolledjde daıyndalady. Ortalyq qalalyq aýrýhanaǵa kúrdeli jóndeý jáne tehnıkalyq jaraqtandyrý jumystary júrgiziledi. Sondaı-aq jylýmen jáne elektrmen jabdyqtaý men káriz jelileriniń tozý deńgeıin tómendetý josparlanyp otyr. 15 aýla aýmaǵyn abattandyrý esebinen balalarǵa qolaıly jaǵdaı jasalady.
Eske sala keteıik, Memleket basshysy monoqalalarǵa qatysty memlekettik saıasatty qaıta qaraý, olardyń odan ári damýyna jáne eń bastysy, onda turatyn azamattarǵa qoldaý kórsetýdi tapsyrdy.
Qasym-Jomart Toqaev 27 monoqalanyń árqaısysynyń turaqty ekonomıkalyq ósimnen bastap toqyraýǵa deıin damý perspektıvalary ártúrli ekenin atap ótti. Olardyń keıbiri naryqqa beıimdelip, ekonomıkasyn ártaraptandyryp úlgerdi. Biraq jalpy damý jolyndaǵy teńgerimsizdik aıqyn.
Osyǵan baılanysty Ulttyq ekonomıka mınıstrligi monoqalalardy damytýda keshendi tásildi qoldaný maqsatynda, sondaı-aq jańa sharalardy júıeleý jáne iske asyrý úshin tıisti Jol kartasyn ázirlep jatyr.
Jol kartasynda Monoqalalardy memlekettik qoldaý sharalarynyń biryńǵaı tizbesin, Áleýmettik-ekonomıkalyq damytýdyń keshendi josparlaryn ázirleý, ındýstrııalyq aımaqtar men ozyq damý aýmaqtaryn qurý jáne t.b. máseleler kózdelgen.
Qazaqstanda 89 qala bar, onyń 27-si – 1,4 mln halqy bar monoqalalar. Olar ónerkásip ónimderiniń shamamen 40%-yn óndiredi.
Ekonomıkany ártaraptandyrý maqsatynda 5 monoqalada 2 806 jumys ornyn asha otyryp 214,3 mlrd teńge somaǵa 14 «zákirlik» joba iske asyrylyp jatyr.