Qala kúni qarsańynda almatylyq eki myńnan asa joǵary synyp oqýshylary bir mezette toǵyzqumalaq oınap, Qazaqstannyń Gınnes rekordtar kitabyna endi. Aıtýly merekeni shahar ákimdiginiń qoldaýymen Toǵyzqumalaq qaýymdastyǵy uıymdastyrdy.
Oı utqyrlyǵyn ushtap, tabandylyqqa tárbıeleıtin toǵyzqumalaq oıyny qala mektepterinde oqýshylardyń úzdik úıirmesine aınalǵan. Oıyndy jetik meńgergen jetkinshekter respýblıkalyq saıystarda júlde alyp júr. Almaty qalasy Bilim basqarmasynyń basshysy Lázzat Jylqybaeva myńdaǵan shákirtti bir alańda jınaǵan aıryqsha joba qatysýshylaryna sáttilik tilep, oıyndy saltanatty túrde ashyp berdi. Kilemshe ústine jaıǵasqan toǵyzqumalaqshylar birneshe saǵat boıy tapjylmaı otyryp ózderiniń súıikti oınyn oınady.
«Toǵyzqumalaq úıirmesine qatysqanyma eki jyl boldy. Úıirmede dostarymmen, demalys kúnderi ákemmen toǵyzqumalaq oınaımyn. Al myńdaǵan adam jınalyp oınaǵan tipten qyzyq eken. Búgingi jobaǵa qatysqanyma qýanyshtymyn», deıdi 10 synyp oqýshysy Dana Sálim.
Jas rekordshylarǵa sát sapar tilegen Dúnıejúzilik jáne respýblıkalyq toǵyzqumalaq federasııasynyń prezıdenti Álıhan Báımenov Almaty qalasy toǵyzqumalaq zııatkerlik oıynynyń ortalyǵy bolyp tańdalǵanyn, ulttyq oıyndy álemdik deńgeıde damytý baǵytynda aýqymdy bastamalar qolǵa alynǵanyn jetkizdi. Atap ótsek, 2020 jyly toǵyzqumalaq IýNESKO sheshimimen adamzattyń mádenı muralar tizimine engen bolatyn.
ALMATY