Kıiktiń kıesi bar sekildi, jerdiń de óz ıesi bar. Nura – kıikterdiń Arqadaǵy mekeni. Sol kıeli ańnyń kóptigi bir jaǵynan Nuradaǵy sharýashylyqtardyń, bizdiń bas aýrýymyzǵa aınalyp otyr. Aqbókender egis alqabyn taptap, ájepteýir shyǵynǵa batyrdy.
Kıik sanynyń jyl saıyn óskeni qıyn bolyp tur. Búgingi tańda sharýa ıelerimen uıymdasyp, ınspektorlarmen birlesip, egis alqabynan kıik tabynyn aıdap jatsaq ta, barlyq alqapty aman alyp qalý múmkin bolmaı tur.
Osy máselemen betpe-bet kelip júrgenimizge tórt jyl boldy. Sanyn azaıtý kerek dep oılaımyz. Bıdaı shyqqan kezde tóldeý naýqany bastalady. Sol ýaqytta qıyndyq týdyrady. Kombaınmen oraq oryp, sharýa istep júrse, kıiktiń kishkentaı laqtary jatady. Sony alyp, basqa jerge aparsaq, ınspektorlar aıyppul salady. Qolymyz baılanyp otyr. Mysaly, aýdanymyzda 10-15 ǵana ınspektor bar. Myńǵyrǵan kıikke qalaı ıe bolady?
Qalaı desek te, egistigimizge zardaby zor bolyp tur. Meniń 2 myń gektar jerimdi taptap, eginimdi jep ketti. Olardyń tuıaqtary ótkir keledi. Júgirgende túbimen julyp alady. О́tken jyly da osy máseleni kóterip, Aýyl sharýashylyǵy, Ekologııa mınıstrlikterine hat jazdyq. Jaýap joq. Estýimizshe, Abaı aýdanyndaǵy eki sharýashylyqqa, Osakarov aýdanyndaǵy 11 sharýashylyqqa da kıik tabyny zardabyn tıgizip otyr eken.
Eń kóp egin alqaby Nura aýdany dep eseptesek, bizdiń aýdanda 23 sharýashylyqtyń egis alqaby taptalypty. Al oblys boıynsha eseptesek, 13 aýyldyń 36 sharýashylyǵyna zardabyn tıgizdi. Jalpy kólemi 38 440 gektardy quraıtyn egistik jerleri taptaldy.
Buǵan qosa, basqa sharýashylyqtarǵa tıesili jaıylymdyq jáne shabyndyq jerlerdiń taptalýynan mal azyǵynyń tıisti kólemin daıyndaı almaý qaýpi bar. Sharýalar osy máselelerdi eskere otyryp, kıikterdi egistik alqabyn taptatpaýǵa jol bermeý úshin shuǵyl sharalar qabyldaý qajettigin jetkizedi.
Saıyn IBRAGIMOV,
«Qulanótpes» JShS dırektory
Qaraǵandy oblysy,
Nura aýdany