Úkimette QHR bıznes kapıtandarymen ózara is-qımyl algorıtmi jáne áleýeti bar birlesken ınvestısııalyq jobalardyń jol kartasy ázirlenedi.
Jýyrda vıse-premer Serik Jumanǵarın memlekettik organdar men ulttyq kompanııalardyń basshylarymen otandyq ónimdi ótkizýdiń jańa naryqtary jáne Qytaı, Iran, Aýǵanstanǵa eldegi zamanaýı óndirister qurý múmkindikterin ashatyn memlekettermen yntymaqtastyqty kúsheıtý maqsatynda atqarylyp jatqan jumystar men qabyldanyp jatqan sharalardy talqylady.
Qytaımen aradaǵy yntymaqtastyq – basty nazarda. Vıse-premerdiń taıaýdaǵy aspanasty eline sapary Qazaqstanda joǵary tehnologııalyq óndirister qurý boıynsha keń perspektıvalar ashady. Metaldardy óńdeý, elektrondyq kommersııa, qurylys, jańa materıaldar men tehnologııalar óndirisi, AО́K salalaryndaǵy iri álemdik kóshbasshy kompanııalardyń basshylary yntymaqtastyqty nyǵaıtýǵa ashyq qyzyǵýshylyq bildirdi.
Memleket basshysynyń Joldaýda belgilegen óńdeýshi sektordy jedel damytý jáne ónimdi joǵary deńgeıde óńdeıtin klasterlerdi qurý týraly mindetin tıimdi áriptestik pen úzdik tájirıbelerdi engizý arqasynda oryndaýǵa bolady.
«Qytaı – bizdiń shyǵystaǵy eń jaqyn kórshimiz jáne ónimderimizdi ótkizetin eń tartymdy jáne qoljetimdi naryqtardyń biri. Sapar barysynda biz jeti iri kompanııamen kezdesýler ótkizdik, Shenchjendegi dóńgelek ústelde tuqym, fosfor tyńaıtqyshtary, pestısıdter óndiretin qaýymdastyqtar, kólik, logıstıka, sertıfıkattaý kompanııalary ókilderimen tanystyq, olardyń barlyǵy birlesip jumys isteýge jáne tájirıbe, tehnologııa, ǵylymı ázirlemelermen almasýǵa daıyn ekenderin bildirdi. Endi biz yntymaqtastyq baǵytynan bastap jobany Qazaqstanda lokalızasııalaýǵa deıin ár kompanııa boıynsha ózara is-qımyl algorıtmin pysyqtaý qajet. Algorıtmdi pysyqtaý úshin «Qaztrade», «Kazakh Invest» jáne «Atameken» UKP ókilderinen jumys tobyn qurýdy jáne barlyq múddeli mınıstrlik jáne vedomstvomen jobalardyń jol kartasyn qurýdy tapsyramyn», dedi Serik Jumanǵarın.
Sondaı-aq keńeste Qazaqstan men Iran arasyndaǵy taýar aınalymyn 3 mlrd dollarǵa deıin jetkizý jónindegi is-sharalar talqylandy. Qujat jobasy AО́K, kólik jáne logıstıka, munaı-gaz salasyndaǵy ınfraqurylymdyq jobalardy damytýǵa baǵyttalǵan 30 is-sharadan turady. Ony Iran tarapy qarap jatyr. EAEO men Iran arasyndaǵy erkin saýda aımaǵy týraly kelisimge osy jyldyń sońyna deıin qol qoıylady dep kútilýde, osyǵan oraı bul qujat asa ózekti bolyp otyr.
Budan basqa qazaq-aýǵan bıznes-forýmy barysynda qol qoıylǵan kelisimderdi iske asyrý úshin Aýǵanstanmen ózara esep aıyrysý tetikteri talqylandy.