Elorda áýejaıyna Qazaqstannyń shahmatshy qyzdary mingen ushaq qondy, dep habarlaıdy Egemen.kz Astana ákimdiginiń baspasóz qyzmetine silteme jasap.
El táýelsizdiginiń tarıhynda tuńǵysh ret shahmattan álem chempıonatynyń kúmis júldegerin Astana qalasynyń Dene shynyqtyrý jáne sport basqarmasynyń basshysy Samat Jylqybaev, basqarmaǵa qarasty Sportty olımpıadalyq emes túrleri boıynsha damytý dıreksııasy jáne №7 balalar men jasóspirimder sport mektebiniń basshylyqtary kútip aldy. Sondaı-aq shahmatshy qyzdardyń ata-analary, jaqyndary men dostary da boldy.
«Bar kúshimizdi saldyq. Jarys óte tartysy ótti. Birinshi orynǵa talastyq, alaıda Grýzııa quramasyna jol berip kúmis júldeger atandyq. Qazaqstan tarıhynda tuńǵysh ret álem chempıonatynda ekinshi orynǵa ıe boldyq. О́te qýanyshtymyz. Qazaq eli qýandy dep oılaımyn, ózimizde de qatty qýanyp turmyz», deıdi álem chempıonatynyń kúmis júldegeri Ámına Qaıyrbekova.
Aıta ketý kerek, fınalda qazaq qyzdary Grýzııa quramasyna jol berdi. Aqtyq kezeńniń alǵashqy matchynda Qazaqstan – 1,5-2,5, ekinshi matchynda – 0,5-3,5 esebimen jeńilip qalǵan bolatyn.
Ulttyq qurama sapynda Bıbisara Asaýbaeva, Ksenııa Balabaeva, Alýa Nurmanova Ásel Serikbaı jáne qos astanalyq shahmatshy – Merýert Kamalıdenova men Ámına Qaıyrbekova óner kórsetti.
Al qola medaldi Fransııa quramasy ıelendi. Olar úshinshi oryn úshin oıynda AQSh shahmatshylarynan aılasyn asyrdy.
Eske salsaq, shahmattan 2023 jylǵy komandalyq álem chempıonaty Polshanyń Bydgosh qalasynda ótti. Onda 12 komanda baq synady. Týrnır 2007 jyldan beri uıymdastyrylyp keledi. Biraq Qazaqstan buǵan deıin shırek fınaldan ári asyp kórgen emes.