Memleket basshysy LY iTECH kompanııasynyń tóraǵasy Szen Fansın men HGTECH Co. Ltd kompanııasynyń tóraǵasy Ma Sınsıandy qabyldady, dep habarlaıdy Egemen.kz Aqordanyń baspasóz qyzmetine silteme jasap.
Prezıdentke turmystyq tehnıkalardyń, avtokólikter men smartfondardyń qosalqy bólshekterin shyǵaratyn jáne ınnovasııalyq tehnologııalar salasynda jumys isteıtin Qytaıdyń iri joǵary tehnologııalyq kásiporyndary jóninde málimet berildi.
Áńgimelesý barysynda ınvestısııalyq jobalardy júzege asyrý jáne qosalqy bólshekter men lazerlik qurylǵy óndirý úshin Qazaqstannan sırek kezdesetin metaldardy turaqty túrde jetkizý isin jolǵa qoıý perspektıvalary talqylandy.
Sonymen qatar elimizdiń ınnovasııalyq áleýetin nyǵaıtý máseleleri de qarastyryldy.
Qasym-Jomart Toqaev eki eldiń strategııalyq seriktes ekenin, sonyń ishinde Qytaıdyń «Bir beldeý – bir jol» jahandyq bastamasy aıasynda yntymaqtastyq ornatqanyn atap ótti.