Kıiktiń shekten tys kóbeıip ketip, egistik alqaptaryna qaýip tóndirgen kezi keńes zamanynda da bolǵan. Aqbóken antalap ketken shaqta ań sharýashylyǵynyń mamandary túnde AN-24 ushaǵymen atyp, tezdetip Qostanaıdaǵy et kombınatyna jetkizip beretin.
Bıyl jaz boıy myńdap órip júrdi. Motosıkl men «Jıgýlıge» minip alyp árkim óz alqabyn kúzetti. Bizdiń egistik 70 shaqyrym qashyqta, oǵan kún saıyn baryp turý múmkin emes. 500-ge tarta gektar arpamyz kıikke jem boldy. Bıdaıdyń da birazy kıiktiń tuıaǵynyń astynda qaldy. Áýlıekólden 8 adam komıssııa kelip, shyǵynymyzdy eseptep akt toltyryp ketken. Aýyldyń shetindegi maldyń mańaıynda da 500-1000-daı kıik jaıylyp júrdi. Bir sharýa qýsa, ekinshi sharýanyń alqabyndaǵy arpaǵa túsedi. Qashqan kıikke jete almaısyń, qýa da almaısyń, jolsyz jermen jóńkile jóneledi. Úıiriniń bas-aıaǵy 5 shaqyrymǵa deıin sozylady. Tirsek jaqta 7-8 myńdaıy júrdi. Atýǵa taǵy bolmaıdy. Qoldan keler qaıran joq, úsh aı boıy ábden tıtyqtatty. Áli kúnge deıin júr.
Kıikten keıin jańbyr dińkeletip ketti. Biz negizinen Áýlıekóldiń áıgili asyl tuqymdy sıyrlaryn ósiremiz. Qystan mal qońdy shyǵý úshin 5 myń tonna shóp kerek. Sonyń 2 myń tonnasyn ǵana jınap aldyq. Endi mal basyn qysqartatyn shyǵarmyz. Qysty kúni qalaı baǵamyz? Áp-ádemi jaıqalyp turǵan 500 gektar egistigimiz joq boldy. Jaǵdaı – aýyr. Memleket qolushyn sozyp, qarjylaı kómek kórsetkenniń ózinde ol aqshany malǵa bere almaımyz ǵoı.
Sondyqtan qalaıda kıik sanyn rettep otyratyn bir amal tabý kerek. Bul máselege konservi shyǵaratyn kásiporyndardy tartyp, kıik azaıyp ketpeý úshin ony qorǵaıtyn zań kúshin áli de qataıta tússe, belgili bir mólsherden asqanyn óndiris kózine aınaldyrsa, quba-qup. Budan kıik te, sharýa da utylmaıdy dep oılaımyn. О́ıtkeni túz janýarlarynyń sany shekten tys kóbeıip ketse, indet taraýy múmkin. Bul kıikke de, qorshaǵan ortaǵa da, saıyn dalanyń bir shetindegi shalǵaı eldi mekende turyp jatqan adamdarǵa da qaýipti.
Dýlat JAŃBYRShINOV,
«Moskalevskoe» JShS basshysy
Qostanaı oblysy,
Áýlıekól aýdany