Qazaqstan halqy tilderi kúni merekesine oraı QR Prezıdentiniń Is basqarmasynda «Memlekettik til – tatýlyqtyń negizi» taqyrybynda dóńgelek ústel ótti, dep habarlaıdy Egemen.kz.
Memlekettik tildiń mártebesin arttyryp, mańyzyn nasıhattaýǵa arnalǵan jıynǵa Is basqarmasynyń ortalyq apparaty men vedomstvoǵa qarasty uıymdardyń qyzmetkerleri, ýákiletti organdardyń ókilderi, til mamandary qatysty.
Basqosýdy júrgizgen Prezıdent Is Basqarmasynyń uıymdastyrý-baqylaý jáne kadr jumysy bóliminiń meńgerýshisi Erbol Adaev quttyqtaý sóz sóılep, mekemede qazaq tiliniń qoldanylý aıasy keńeıip kele jatqanyn aıtty.
«Bıyl Prezıdenttiń Is basqarmasy júıesinde kadrlardyń áleýetin kóterý úshin memlekettik tildi tereńdetip oqytý jáne iskerlik qazaq tilin úıretý kýrsy ashyldy. Az ýaqyt ishinde 700 qyzmetker osy kýrsqa qatysýǵa tilek bildirdi. Jalpy Is basqarmasy Til saıasaty komıtetimen yntymaqtastyqta jumys istep, memlekettik tildegi qujat aınalymyna monıtorıng júrgizip otyrady. Bıyl II toqsandaǵy monıtorıng nátıjesi boıynsha, memlekettik tildegi shyǵys qujattarynyń úlesi 91 paıyzǵa jetti», dedi ol.
E.Adaev aıtyp ótkendeı, irgeli ujymda memlekettik tilde is júrgizý deńgeıi joǵary deýge bolady. Jumysty áli de jandandyryp, júz paıyzdyq kórsetkishke jetý kózdelip otyr.
Alqaly jıynda Ǵylym jáne joǵary bilim mınıstrligine qarasty Til saıasaty komıtetiniń tóraǵasy, belgili alashtanýshy ǵalym Erbol Tileshov «Til jáne tanym» taqyrybynda mazmundy baıandama jasady.
«Memlekettik til – halqymyzdy tutastyratyn, yntymaqtastyratyn negizgi faktor. Qazaq tilin bilý otansúıgishtiktiń kórinisi. О́zimizdi tanyǵymyz kelse, memlekettik tildi meńgerýimiz kerek. Qazaq tili qoǵamdyq ómirdiń barlyq salasynda qoldanýǵa bolatyn til. Bul tilde ǵylym jasaldy, resmı is qaǵazdary júrgiziledi. Til – tanymnyń quraly ekenin árdaıym esimizde ustaıyq», dedi ǵalym.
Budan bólek, dóńgelek ústelde tanymal aýdarmashy Kamal Álpeıisova «Ilespe aýdarma – memlekettik tildiń qoldanys aıasyn keńeıtý quraly» taqyrybynda dáris oqyp, kóp jylǵy is-tájirıbesimen bólisti. Is basqarmasynyń júıesinde qyzmet etetin memlekettik tildi damytý jónindegi mamandar men qazaq tilin jetik biletin, túrli salada tabysty eńbek etip júrgen ózge de azamattar baıandama jasap, til úırenýdegi utymdy ádisterimen bólisti.
Prezıdenttiń Is basqarmasynyń ortalyq apparatynda jáne vedomstvoǵa qarasty mekemelerde uzaq jyldardan beri eńbek etip, memlekettik tildiń qoldanys aıasyn keńeıtýge atsalysyp júrgen qyzmetkerler az emes. Jıyn sońynda osy mamandardyń memlekettik tildi damytýǵa qosqan úlesi erekshe atalyp, Prezıdent Is basqarmasynyń apparaty basshysynyń Alǵys hatymen marapattaldy.