Almatyny bes kún boıy opera men balettiń jaýharlarymen dýmanǵa bólegen halyqaralyq festıval eń sońynda úlken konsertpen aıaqtaldy. Klassıkalyq ónerdiń darabozdary “Aqqý kóli”, “Jızel” baletterinde jarqyrap, “Qarǵanyń mátkesi”, “Bogema” operalarynda saırady.
Abaı atyndaǵy memlekettik akademııalyq opera jáne balet teatry “JTI Kazakhstan” kompanııasymen birigip uıymdastyrǵan XV qazaqstandyq halyqaralyq festıval bekzat ónerdiń órleýine ólsheýsiz úles qosyp júrgen álemdik opera jáne balettiń jaryq juldyzdarynyń ónerin jurtshylyqqa usyndy.
Osylaısha Abaı atyndaǵy memlekettik opera jáne balet teatry osyndaı festıvaldardy ótkizý dástúrin jańǵyrtyp, jylyna 4 ret ótkizýdi josparlap otyr.
Qazaqstanǵa osy festıval deńgeıdegideı opera-balet juldyzdary kelgende, elimiz úshin úsh másele sheshiledi. Birinshiden, bul jergilikti ártister úshin úlken sheberlik dáristeri, ekinshiden, bul zal toly kórermen men óner maıtalmandarynyń sahnalyq qarym-qatynasy. О́ıtkeni, ártis úshin sahna mashyqtanyp, ónerin pash etýge múmkindik beretin jalǵyz mektep. Úshinshiden, bizdiń tyńdarmandar aıtýly juldyzdardy óz sańlaqtarymyzben salystyryp, Qazaqstanda da úlken óner áleýetiniń, baǵalaýǵa turarlyq maıtalmandardyń bar ekenin túsine alady” deıdi ónertanýshylar.
Qysqasy, 5 kún boıy Almaty kórermenderine álemdik óner jaýharlarymen, opera men balettiń álemge aty máshhúr juldyzdarymen qaýyshý múmkindigi týdy. Italıandyq kompozıtor Per-Domınık Ponnel, reseılik dırıjer Andreı Anıhanov, Reseıdiń Úlken teatrynyń prımasy Anna Antonıcheva, Sankt-Peterbýrgtegi Marııa teatrynyń balet solısteri Aleksandr Volchkov pen balerına Anatasııa Volochkova, álemdik opera juldyzy Netta Or, Sankt-Peterbýrgtegi Marııa teatrynyń barıtony Vıktor Chernomyrsev, Ýkraına ulttyq opera teatrynyń sopranosy Tatıana Anısımova óner kórsetip qana qoımaı, jýrnalısterge tamasha suhbattar berýge de úlgerip jatty.
Aınash ESALI,
ALMATY.