Jezqazǵannyń irgesindegi Qabanbaı batyr aýyly negizinen geologter mekeni sanalady. Aýyldyń burynǵy ataýy «Geologııa ekspedısııasy», dep atalatyn. Geologııalyq barlaý kompanııasy osy aýyldyń ortalyǵynan jalpy quny 7 mlrd teńge quraıtyn geologııa klasteriniń qurylysyn bastady. Ulytaý oblysynyń ákimi Berik Ábdiǵalıuly bolashaq irgeli qurylystyń jobasymen arnaıy baryp tanysty.
– Prezıdent bıylǵy Joldaýynda «Geologııalyq barlaý isi aıryqsha nazar aýdarýdy qajet etedi. Elimizdiń mıneraldy shıkizat bazasyn tolyqtyrý úshin 2018 jyly taý-ken salasyn basqarý máselesine qatysty jańa zańdar qabyldandy. Biraq zań talaptary tolyq oryndalmaı jatyr. Sonyń saldarynan tabıǵı resýrsqa qansha baı bolsaq ta, kópten beri aýyz toltyryp aıtatyn geologııalyq jańalyq ashylǵan joq. Ahýaldy dereý ózgertý kerek», dep atap kórsetken edi. Joldaý talaptaryn júzege asyrýdyń alǵashqy qadamdarynyń biri ispetti elimizdegi tuńǵysh geologııa klasteri kelesi jyldyń alǵashqy toqsanynda tolyq qýatynda jumys istep, 150 adamdy jumyspen qamtamasyz etedi, dedi oblys basshysy.
Qazirgi kezde oblys aýmaǵyndaǵy 19 núktede barlaý jumystary júrgizilýde. Maqsat – mıneraldy-shıkizat qoryn ulǵaıtý. Geologııa klasteri aýmaǵynda oqý ǵımarattary, qyzmetkerlerge arnalǵan jataqhana, geofızıka zerthanasy jáne jer qyrtysynyń synamalaryn saqtaıtyn qoıma, geologııa murajaıy salynady. О́te tereńde ornalasqan nemese quramynda túrli elementterdiń qospalary bar ken shıkizatyn tehnologııalyq jolmen bólip alyp shyǵatyn ǵylymı negizdeme qajet. Geologııa klasteri osy baǵyttaǵy ǵylymı izdenister men naqty isterdi Jezqazǵan óńirinde damytý maqsatyn kózdeıdi.
Joba jeke kompanııanyń ınvestısııalyq qarjysy arqyly júzege asyrylady.
Ulytaý oblysy