Mádenıet jáne aqparat mınıstrligi «Daryn» memlekettik jastar syılyǵyna baıqaý jarııalady, dep habarlaıdy Egemen.kz atalǵan vedomstvoǵa silteme jasap.
«Daryn» memlekettik jastar syılyǵy–ǵylym, shyǵarmashylyq, qoǵamdyq qyzmet salalarynda jemisti eńbegimen kózge túsken, sondaı-aq joǵary sporttyq jetistikteri úshin daryndy jastardy memleket tarapynan qoldaý maqsatynda usynylady. Baıqaý 10 nomınasııa boıynsha ótedi:
- «Ádebıet», - «Ǵylym», - «Dızaın jáne beıneleý óneri», - «Jýrnalıstıka», - «Klassıkalyq mýzyka», - «Kreatıvti bastamalar», - «Sport», - «Teatr jáne kıno», - «Estrada», - «Halyq shyǵarmashylyǵy». Syılyq alýǵa úmitker bola alatyndar: halyqaralyq jáne respýblıkalyq konkýrstardyń, festıvaldar men túrli sharalardyń laýreattary, respýblıkalyq jáne halyqaralyq deńgeılerdegi sporttyq jarystardyń júldegerleri men jeńimpazdary, sondaı-aq qyzmeti ınnovasııalyq bolyp tabylatyn jáne tıisti sala men tutastaı qoǵamdy damytýǵa yqpal etken QR 35 jasqa deıingi azamattar. «Daryn» jastar syılyǵyn alýǵa kandıdatýralardy usynýdy memlekettik organdar, qoǵamdyq birlestikterdiń ókilderi júrgizedi. Jeńimpazdarǵa «Daryn memlekettik jastar syılyǵynyń laýreaty» ataǵy beriledi jáne olar dıplommen, tósbelgilermen, sondaı-aq qarjylaı syılyqpen marapattalady. Syılyqty usyný jyl saıyn Qazaqstan Respýblıkasynyń Táýelsizdik kúnin merekeleý aıasynda ótkiziledi. 1992 jyly taǵaıyndalǵan «Daryn» jastar syılyǵyn ár jyldary túrli saladaǵy 320-dan astam azamat ıelengen bolatyn. Konkýrsqa qatysýǵa qujattar 20 qarashaǵa deıin Qazaqstan Respýblıkasy Mádenıet jáne aqparat mınıstrliginiń Jastar jáne otbasy isteri komıteti (qaǵaz nusqada) myna mekenjaı boıynsha: Astana qalasy, Mángilik el dańǵyly 10, «Mınıstrlikter úıi» ǵımaratynda (14-kireberis) qabyldanady. Al elektrondyq nusqany premiya.daryn@gmail.com poshtasyna joldaýǵa bolady. Baılanys nomerleri: 8(7172) 74-05-25, 8(7172) 74-18-43, 8 701 170 46 54.