Kásipker, «Akan Building» kompanııasynyń negizin qalaýshy Aqan Baqytjan muqtaj stýdentterge kómektesetin «ENU Endowment Fund» qoryna qarjy quıdy. Bul qarajat L.N.Gýmılev atyndaǵy Eýrazııa ulttyq ýnıversıtetiniń qoldaýdy qajet etetin daryndy izdenýshilerine qaıyrymdylyq kórsetýge jumsalady.
Joǵary oqý orny taratqan aqparatqa súıensek, ýnıversıtet urpaqtar sabaqtastyǵyn damytyp, túlekter men stýdentter arasyndaǵy baılanysty nyǵaıtý nátıjesinde burynǵy túlekter qazirgi stýdentterge belsendi túrde qoldaý bildirip, qamqorlyq kórsetip keledi. Sol bir sabaqtastyqtyń bir kórinisi – Aqan Baqytjannyń «ENU Endowment Fund» qorynyń maqsatty kapıtalyn 10,5 mln teńgege tolyqtyrýy. Ol L.N.Gýmılev atyndaǵy EUÝ-da «Qurylys» mamandyǵy boıynsha bilim alǵan.
«ENU Endowment Fund» muqtaj stýdentterge kómektesedi. Bul – qaıyrymdylyq. Der kezinde kómek alǵan azamattar keleshekte tabysqa jetip, el damýyna úles qossa, biz úshin eń jaqsy marapat sol bolmaq. Men ýnıversıtet túlekteriniń barlyǵyn ózi bilim alǵan joǵary oqý ornyna kómektesýge shaqyramyn. Búgingi stýdentterge aıtarym, bilimdi adamdar jetistikke jetedi. Sondyqtan óz bilimderińizge ınvestısııa salyńyzdar, eldiń bolashaǵy – sizderdiń qoldaryńyzda. Stýdenttik ómirińizdi jarqyn ári belsendi ótkizýdi umytpańyz, óıtkeni arada jyldar ótken saıyn dál osy stýdenttik shaqty esińizge alyp otyrasyz», deıdi ýnıversıtet túlegi, kásipker A.Baqytjan.
Osylaısha, EUÝ túlekteri men mesenattardyń ýnıversıtet damýyna qosqan úlesine arnalǵan Dańq aǵashynyń japyraǵyna Aqan Baqytjannyń esimi jazyldy.
«ENU Endowment Fund» qoryn 2022 jyldyń sáýir aıynda daryndy jáne muqtaj stýdentterdi qoldaý maqsatynda ýnıversıtet túlekteri qurǵan bolatyn. Qordyń maqsatty kapıtalyna qol suǵylmaıdy, onda qarjy tek jınaqtalady. Odan túsken ınvestısııalyq tabys esebinen ǵana jobalardy qarjylandyrýdy júzege asyrý josparlanǵan.