«Astana» qashan eńse kóteredi?

Buǵan deıin Chempıondar lıgasy men Eýropa lıgasynyń toptyq saıystarynda baq synap, Qart qurlyqtyń adýyndy komandala­ryna azýyn batyryp úlgergen «Astana» araǵa úsh salyp qaıtadan Eýrokýbok básekeleriniń toptyq kezeńine oraldy. Elordalyq ujym bul joly birer jyl buryn ǵana tusaýy kesilgen Konferensııa lıgasynda baq synamaq. Biraq jerlesterimizdiń bul lıgada al­ǵashqy qadamy asa sátti basta­la qoıǵan joq. S tobynda Hor­va­tııanyń «Dınamo Zagreb», Chehııa­nyń «Vıktorııa» jáne Kosovo­nyń «Balkanı» komandalarymen synǵa túsetin «Astana» alǵash­qy týrda «Dınamomen» kezdesip, 5:1 esebimen oısyraı jeńildi.

Otandyq maman Grıgorıı Ba­baıan jattyqtyratyn elordalyq klýb Horvatııanyń komandasymen bıyldyqqa osymen úshinshi márte, al jalpy bes ret jasyl alańda jolyǵyp, barlyǵynda da qarsylastaryna jol berdi. Eń ókinishtisi, keıingi úsh matchtyń ese­bin qosa eseptegende «Astana» «Shaqpaq jeıdeli» eldiń dańq­ty komandasynan jalpy esepte 11:1 esebimen tas-talqany shyǵyp je­ńildi. «Astana» alǵash ret Chem­pıondar lıgasynyń ekinshi irikteý kezeńinde óz alańymyzda 2:0 ese­bimen jeńilse, Zagrebtegi oıynda 4:0 nátıjesimen jerlesterimiz ja­narymen jer shuqyp qaıtty. Osy oıyndardan qorytyndy shy­ǵara almaǵan Grıgorıı Babaıan shákirtteri bul joly syrt alań­da taǵy da masqara bolyp je­ńildi. Keıingi jyldardaǵy ult­tyq quramamyzdyń táýir oıyny­nan keıin Eýropada elimizdiń bet beınesine aınalyp úlgergen «As­tana» klýbynyń kúreýi jan­kú­ıerlerdiń yzasyn týǵyzǵany anyq.

Osydan birer aı buryn ǵana ótken kezdesýlerde «Dınamo» sapynda Horvatııa quramasynyń negizgi qaqpashysy Domınık Lı­vakovıch, «Astana» qaqpasyna bir emes, úsh gol soqqan Lýka Ivanýshech, tasqamal qorǵaýshy Iosıp Sýtalo jáne taǵy basqa negizgi quramda oınaǵan myqty fýtbolshylar komandadan ketip qalsa da, olardyń orny oısyrap qalǵan joq, qaıta kúsheıe túskenin keshegi matchtyń esebi aıtyp tur. Al osy ýaqyt aralyǵynda «Astananyń» oıyny keri ketip bara jatqandaı.

Zagrebtiń «Maksımır» stadıo­nynda ótken eki ujym arasyn­da­ǵy kezdesýdiń alǵashqy bóligin­de elordalyqtar bir gol ótkizip alsa da, jaman oıyn kórsetken joq edi. Alaıda ekinshi taımda «Astana» fýtbolshylary alańda ne úshin júrgenderin umytyp qalsa kerek, áıteýir óz qaqpalaryna baqandaı tórt gol ótkizip aldy. Dınamolyqtar alǵashqy eki golyn penaltıden soqsa, qalǵan úsh tobyn oıyn jaǵdaıynda bizdiń qaqpaǵa engizdi. Atap aıtqanda, kezdesýdiń 43-shi jáne 53-mınýtynda Brýno Petkovıch 11 metr­lik aıyp dobynan múlt ketpese, 58-mınýtta Marko Býlat, 85-shi mınýtta Antonıo Marın jáne match aıaqtalar tusta, ekin­shi taımda alańǵa shyqqan Tıbor Halılovıch mergendigimen kózge tústi. Al «Astana» sapynan jalǵyz jubanysh golyn matchtyń 78-mınýtynda qorǵaýshy Kamo Oganesıan soqty. Qorytyndy esep – 5:1.

Bul jeńilisten keıin «Astana» klýbynyń jankúıerleri áleýmettik jelilerde bas bapker Grıgorıı Babaıannyń jumysyna kóńilderi tolmaıtynyn jáne onyń óz erkimen otstavkaǵa ketýin talap etip jatyr. G.Babaıan bolsa, matchqa deıingi jáne matchtan keıingi baspasóz máslıhatynda da «Dınamonyń» jo­ǵary deńgeıdegi qarsylas ekenin, olar Konferensııa lıgasynda emes Eýropa lıgasynda oınaý­ǵa laıyq ujym ekenin aıtýdan jalyq­qan joq. Al «Astana» she, mundaı ­oıynymen Konferensııa lıgasynda oınaýǵa laıyq pa?

Konferensııa lıgasynyń birin­shi týr oıyndarynan ke­ıin S tobynda «Dınamo» men «Vıktorııa» komandalary úsh upaımen kósh bastady. Chehııa komandasy alǵashqy týrda Ko­sovanyń «Balkanı» komandasyn óz alańynda 1:0 esebimen tize búktirdi. Elordalyqtar ekinshi týrda óz alańynda Chehııanyń «Vık­torııa» klýbyn qabyldaıdy. Kez­desý 5 qazanǵa josparlanǵan.

Sondaı-aq ulttyq qurama­my­z­­dyń kóshbasshy fýtbolshysy Baq­tıer Zaınýtdınov óner kór­setetin Túrkııanyń «Beshıktash» klýby da Konferensııa lıgasynyń toptyq kezeńindegi alǵashqy týr oıynyn syrt alańda Belgııa­nyń «Genk» komandasymen ótkizip, 1:1 esebimen teń tústi. Jerlesimiz bul oıynda alańǵa ekinshi taımda qo­sal­qy quramnan shyqty.