Qazaqstan Prezıdenti Qasym-Jomart Toqaev Reseı, Belarýs jáne Qyrǵyzstan úkimetteriniń basshylarymen kezdesti, dep habarlaıdy Egemen.kz Aqordaǵa silteme jasap.
Prezıdent Qasym-Jomart Toqaev Reseı, Belarýs jáne Qyrǵyzstan úkimetteriniń basshylaryna iltıpat bildire otyryp, qazaq jerinde tuńǵysh ret ótkizilip jatqan halyqaralyq «Innoprom. Qazaqstan» ónerkásip kórmesine qoldaý kórsetkeni úshin olarǵa rızashylyq bildirdi.
«Sizderdiń arnaıy kelgenderińiz kórmeniń mártebesin arttyrǵany sózsiz jáne tyǵyz saýda-ekonomıkalyq qatynastarymyzdy taǵy bir ret dáleldedi. Búginde atalǵan is-shara turaqty iskerlik alańǵa aınalyp keledi. Bul – qýanyshty jaıt. Kórme aıasynda áleýetti seriktester men ınvestorlar elderimizdiń ındýstrııalyq sektorynyń jetistikterimen jaqynyraq tanysady, sondaı-aq ózara tıimdi jobalardy iske asyrý úshin jańa múmkindikterge jol ashylady», dedi Qasym-Jomart Toqaev.
Memleket basshysynyń aıtýynsha, ónerkásip, energetıka, mashına jasaý, aýyl sharýashylyǵy jáne ekonomıkanyń basqa da salalarynda birlesken kásiporyndar men iri jobalar sany artyp keledi.
Kezdesý barysynda tórt eldiń ózara balıanysynyń nátıjesinde syrtqy saýda kólemi artyp, osy jyldyń alǵashqy alty aıynda 13 paıyzǵa jetkeni aıtyldy.
Qasym-Jomart Toqaev Qazaqstan men Reseı arasynda saýda, ınvestısııa jáne ónerkásip salalary boıynsha qarym-qatynas qarqyny joǵary ekenin aıtty.
«Reseı kompanııalary Qazaqstanǵa turaqty túrde ınvestısııa salyp otyrǵan bes negizgi eldiń qataryna kiredi. Búginde Reseımen birlesip, jalpy somasy 16,5 mıllıard dollar bolatyn 40 iri jobany júzege asyryp jatyrmyz», dedi Prezıdent.
Memleket basshysy Belarýspen aradaǵy qarym-qatynas týraly aıta kele, aýyl sharýashylyǵy tehnıkasyn shyǵarý jáne mashına jasaý salalaryndaǵy tájirıbeni oń baǵalady. Bul baǵyttaǵy jobalardyń jalpy quny – shamamen 180 mıllıon dollar.
Sonymen qatar Qazaqstan Prezıdenti Qyrǵyz Respýblıkasymen aradaǵy baılanystarymyzdyń turaqty damyp kele jatqanyna, ózara saýda-sattyq qarqyny joǵary ekenine nazar aýdardy.
«Jeti aıda eki el arasyndaǵy saýda-sattyq kólemi byltyrǵy osy kezeńmen salystyrǵanda 13 paıyzǵa ósti. Qazaq-qyrǵyz shekarasynda Indýstrııalyq saýda-logıstıkalyq keshen salýdyń keleshegi zor», dedi Qasym-Jomart Toqaev.