Senat Tóraǵasy Máýlen Áshimbaev Vetnam Ulttyq jınalysy depýtattarynyń delegasııasymen kezdesti. Kezdesý barysynda ekijaqty yntymaqtastyqty jáne parlamentaralyq baılanysty odan ári damytý máseleleri talqylandy, dep habarlaıdy Egemen.kz Senattyń baspasóz qyzmetine silteme jasap.
Máýlen Áshimbaev sheteldik áriptesterine iltıpat bildirip, búginde Qazaqstan men Vetnam arasynda joǵary deńgeıde syndarly jáne ózara senimge negizdelgen dıalog ornaǵanyn atap ótti. Aldaǵy ýaqytta eki eldiń Memleket basshylary belgilep bergen ózara is-qımyldyń osy qarqynyn ári qaraı jalǵastyrýdyń mańyzy zor.
«Qazaqstan Prezıdenti Qasym-Jomart Kemeluly Toqaevtyń Vetnamǵa resmı sapary ekijaqty baılanysty damytýǵa tyń serpin berdi. Sapar aıasynda yntymaqtastyqtyń túrli salasy boıynsha mańyzdy qujattarǵa qol qoıyldy. Parlamentaralyq yntymaqtastyq ekijaqty qarym-qatynastardyń mańyzdy bóligi ekeni sózsiz. Búgingi kezdesý atalǵan sapar barysynda qol jetkizilgen ýaǵdalastyqtardyń nátıjesi ekenin de atap ótken jón. Aldaǵy ýaqytta salalyq komıtetter men «Qazaqstan-Vetnam» dostyq toptarynyń depýtattary arasynda tıimdi baılanys ornatý zańnamalyq baǵytta tájirıbe almasý jolyndaǵy naqty qadam bolary anyq», dedi Máýlen Áshimbaev.
Senat Spıkeri óńiraralyq damý aıasynda Qazaqstannyń oblystary men Vetnamnyń provınsııalary arasyndaǵy yntymaqtastyqty nyǵaıtýǵa qatysty usynys aıtty.
Sonymen qatar kezdesý barysynda taraptar saýda-ekonomıkalyq jáne ınvestısııalyq yntymaqtastyqtyń áleýetine nazar aýdardy. Senat Tóraǵasy Memleket basshysy Qazaqstan halqyna Joldaýynda aıtqan ekonomıkalyq reformalarǵa da toqtalyp ótti. Máýlen Áshimbaev keshendi reformalardy iske asyrýdyń nátıjesinde sheteldik ınvestorlar úshin túrli salada jańa múmkindikter paıda bolyp jatqanyn tilge tıek etti.
О́z kezeginde Vetnam Ulttyq jınalysy Tóraǵasynyń orynbasary Ngýen Hak Dın Qazaqstanda júrgizilip jatqan áleýmettik-ekonomıkalyq jáne saıası reformalardy joǵary baǵalap, kópjaqty yntymaqtastyqty odan ári keńeıtýge múddeli ekenin bildirdi.