Pavlodar oblysynyń ákimi Asaıyn Baıhanov Ekibastuzdyń aldaǵy jylý maýsymyna daıyndyǵyn tekserdi, dep habarlaıdy Egemen.kz oblys ákiminiń baspasóz qyzmetine silteme jasap.
«Ekibastuz JEO-daǵy jóndeý jumystary kestege sáıkes júrgizilip jatyr. Búgingi tańda 3 energetıkalyq qazandyq paıdalanýǵa daıyn jáne jylý berý maýsymy bastalǵanǵa deıin taǵy 3 sý jylytatyn qazandyq agregaty daıyn bolady. Qalǵan 4 qazandyqty jóndeý qazan aıynyń sońyna deıin aıaqtaý josparlanyp otyr. Abaı kóshesindegi 3 jylý magıstralin (№4 mektepten Marǵulan kóshesine deıin) qaıta jańartý jumystary tolyǵymen aıaqtaldy. Atalǵan 3 magıstral joǵary qysymmen synaqtan ótkizilip, qazir jýý jumystary júrgizilip jatyr. Búgin M. Júsip kóshesi boıyndaǵy JM-2 magıstralin (Dostyq dúkeninen «Qazaqstan» kınoteatry aıaldamasyna deıin) synaqtan ótkizý jumystaryna da kiristi. Munda jylý magıstralindegi jańa jáne eski qubyrlardyń túıisken jerin qosatyn tyǵyzdaǵysh kompensator isten shyqty. Qubyrlar zardap shekken joq. Erteń túske deıin aqaý joıylady, sodan keıin osy magıstraldyq jelini synaý jáne jýý jumystary qaıta jalǵasady. Kóktemgi jáne kúzgi gıdravlıkalyq synaqtardan keıin Ekibastuzdyń jylýmen jabdyqtaý jelilerinde barlyǵy 388 aqaý joıyldy. Qala turǵyndarynan kelip túsken ótinishter boıynsha oramishilik jylý jelilerindegi 14 problemalyq ýchaskeni jóndeý jumystary júrgizilip jatyr. О́ńir basshysy JM-1 jáne JM-3 jylý magıstraldaryn qaıta jańartý úshin jobalyq-smetalyq qujattamany daıyndaýdy tapsyrdy. О́ıtkeni, buǵan deıin 1973 jyly salynǵan atalǵan magıstraldyń M.Júsip kóshesi boıyndaǵy ýchaskesinde aqaý oryn alǵan bolatyn. Jumystar júrgizý barysynda mamandar qubyr metalynyń 3 mm-ge deıin juqarǵanyn anyqtady», delingen habarlamada.
A.Baıhanov jańadan tartylǵan jelilerdi joǵary qysymmen tekserip, aqaý shyqsa jóndep, qysqy maýsymǵa daıyndyǵyn tekserý mańyzdy ekenin aıtty. Ekibastuzdaǵy 690 kópqabatty turǵyn úıdiń 665-i jylýdy qabyldaýǵa tolyqtaı daıyn. 25 turǵyn úıde ishki jylytý júıelerin jóndeý, jýý, syǵymdaý jumystary aıaqtalyp keledi.
«1 qazannan bastap Ekibastuzda jylý berý maýsymyn bastaý josparlanyp otyr. Jylýdy qabyldaýǵa daıyndyq boıynsha barlyq jumystar ýaqytynda jáne barynsha sapaly oryndalýy qajet. Kommýnaldyq qyzmetter táýlik boıy jumys rejımine kóshýi kerek. Jylýmen jabdyqtaýdy bastaý bir bólek, alaıda, júıeni teńdestirý de mańyzdy. Jylý jelileri qyzmetteri men qalalyq turǵyn úı ınspeksııasy bólimi tarapynan ishki jylýmen jabdyqtaý júıelerin retteý jáne shetki úılerdegi gıdravlıkalyq parametrlerdi teńdestirý boıynsha úılesimdi jumys qajet», degen Asaıyn Baıhanov byltyrǵydaı keleńsizdik qaıtalanbaýyn qatań tapsyrdy.