Senator Ǵalıasqar Sarybaev Premer-mınıstr Á.Smaıylovtyń atyna depýtattyq saýal joldap, shettegi tarydaı shashyraǵan etnıkalyq qazaqtarǵa qoldaý kórsetýge, qandastarǵa kómektesýge úndedi, dep habarlaıdy Egemen.kz joǵarǵy palatanyń baspasóz qyzmetine silteme jasap.
Úkimet basshysynyń atyna depýtattyq saýal joldaǵan senator shetelde 4 mıllıonǵa jýyq, al beıresmı málimetterge sáıkes 7 mıllıonǵa jýyq qazaq turatynyn aıtty. Depýtat olardyń kópshiliginiń tarıhı otanyna oralý nıeti bar ekenin, biraq olardyń atajurtqa kóship kelýine tusaý bolatyn birqatar sebep baryn da aıtty.
«Qandastardyń ózderiniń ulty qazaq ekendigin dáleldeı almaýy, mentalıtettegi, bilim berý salasyndaǵy aıyrmashylyqtar, tilderdi bilmeýi olardyń múmkindikterin shektep jatyr. Syrtqy ister mınıstrliginiń dıplomatııalyq mekemelerde qurǵan arnaıy komıssııalardyń jumystaryn qaıta jandandyrý kerek. Ártúrli sebeptermen shetelde júrgen otandastarymyzdyń qıyn jaǵdaılarǵa tap bolǵanda olarǵa kórsetiletin kómekti qaıta zerdeleýdi jáne 1990-2000 jyldary bala kezinde sheteldikter asyrap alǵan jetim balalardyń jaǵdaılary týraly tolyq aqparat berýińizdi suraımyn», dedi Ǵ.Sarybaev.
Depýtat halyqtyń kóshi-qon máselelerine qatysty qoldanystaǵy normatıvtik-quqyqtyq aktilerge jıi ózgerister men tolyqtyrýlar engiziletinin, bul Qazaqstanǵa oralǵysy keletin qandastarda olardyń zań talaptaryna sáıkes kelmeýine baılanysty alańdaýshylyq týǵyzatynyn da aıtty. Osyǵan baılanysty Úkimetten kóshi-qon salasynda júzege asyp jatqan memlekettik baǵdarlamalar týraly habardar etýdi surady.