Memleket basshysy jıynda «C5 + Germanııa» dıalogy týraly bastama elder arasyndaǵy yntymaqtastyqqa tyń serpin beretinin atap ótti, dep habarlaıdy Egemen.kz Aqordanyń baspasóz qyzmetine silteme jasap.
Qasym-Jomart Toqaev aımaq memleketteri kóshbasshylarynyń birlesken kúsh-jigerin jumyldyrýǵa bolatyn yqpaldastyqtyń basym baǵyttaryn usyndy. Prezıdent, eń aldymen, saýda-ekonomıkalyq qarym-qatynas, jańa kólik-tranzıt dálizderin damytý, energetıka salasyndaǵy kooperasııa máselelerine nazar aýdardy.
Kezdesý barysynda klımattyń ózgerýine jáne sý tapshylyǵy problemasyna basa mán berildi. Jıynǵa qatysýshylar muzdyqtardyń erýine jáne Ortalyq Azııadaǵy ekologııalyq ahýaldyń ózgerýine baılanysty máselelerdi talqylady. Qazaqstan Prezıdentiniń pikirinshe, Germanııanyń atalǵan problemalardy sheshýdegi tájirıbesi aımaq úshin asa mańyzdy.
Memleketter basshylary Ortalyq Azııa óńiri men Eýropa Odaǵy tóńiregindegi geosaıası jaǵdaıǵa qatysty máselelerdi de qozǵady. Sonymen qatar Aýǵanstandaǵy qazirgi jaǵdaı qarastyryldy.
Germanııa Prezıdenti Frank-Valter Shtaınmaıer Ýkraınadaǵy daǵdarys Eýropanyń, sondaı-aq Ortalyq Azııa elderiniń qaýipsizdigine aıtarlyqtaı áser etedi degen pikir aıtty.
Qasym-Jomart Toqaev buǵan jaýap retinde ózara tıimdi beıbit sheshimder izdeýge baǵyttalǵan salıqaly dıplomatııa qajet ekenin taǵy da málimdedi. Memleket basshysy taraptardyń naqty kelissózderge kirisýi qajet ekenine nazar aýdardy.
Budan bólek, Qazaqstan Prezıdenti Ortalyq Azııa elderi men Germanııa arasyndaǵy mádenı-gýmanıtarlyq baılanystardy keńeıtý qajet ekenine toqtaldy. Atap aıtqanda, Memleket basshysy ǵylym jáne bilim salalaryndaǵy birlesken jobalardy, nemis tilin oqytý baǵdarlamalaryn iske asyrýdy qoldady.
Sonymen qatar kezdesýde Qyrǵyzstan Prezıdenti Sadyr Japarov, Tájikstan Prezıdenti Emomalı Rahmon, О́zbekstan Prezıdenti Shavkat Mırzııoev, Túrikmenstan Halk Maslahatynyń tóraǵasy Gýrbangýly Berdimuhamedov sóz sóıledi.