Beısenbi kúni Azııa oıyndarynda tapanshamen 10 metrge jyljymaly nysana kózdeýden úzdik nátıje kórsetken Zýhra Irnazarova Azııa oıyndarynyń altyn júldegeri atandy. Jerlesimiz buǵan deıin de Azııa chempıonatynda, álem chempıonatynda top jaryp úlgergen edi. Mergen qyzben saıystan keıin qysqasha suhbattasqan edik.
– Zýhra, jeńisten keıin qandaı sezimde tursyz?
– Top jarǵanyma óte qýanyshtymyn. Áli de tolqyp turmyn. Barlyǵy oıdaǵydaı bolǵanyna rızamyn.
– Jekeleı saıysta – birinshi, komandalyq jarysta ekinshi oryn aldyńyzdar. Komandalyq básekede jeńiske jetý úshin ne kedergi boldy?
– Azııa oıyndaryna alǵash ret qatysyp otyrmyz. Sondyqtan qobaljymaı, dáldikpen nysanany kózdegendenimizde, komandalyq saıysta birinshi oryn alatyn edik. Bul jarys qoı, dál qazir kim myqty bolsa, sol jeńiske jetedi. Alda áli talaı júlde alatynyma senimdimin.
– Jarys barysy týraly ne aıtar edińiz?
– Birinshi kezeńde tórtinshi oryn aldym. Ekinshi kezeń aldynda ózimdi qaırap, psıhologııalyq turǵyda daıyndalyp shyqtym. Sońǵy úshinshi kezeńde jeńimpaz atanatynyma senimdi boldym.
– Azııa oıyndaryna daıyndyq qalaı ótti?
– Azııa oıyndary aldynda qurama qyz-jigitteri kúnine eki retten daıyndyq júrgizdi. Jeke bapkerimiz jeńiske jetý úshin baryn saldy. Bapker men bizge qoldaý kórsetken barshańyzǵa rahmet aıtqym keledi.
– Bul sport Olımpıada baǵdarlamasynda joq. Nysana kózdeýdiń basqa túrine aýysqyńyz kelmeı me?
– Joq, ondaı oıymyz joq. Sebebi bul sport túri bizge unaıdy. Meniń syńarym Fatıma kishkene aýyryńqyrap qaldy. Áıtpese onyń nátıjesi menen de asyp túser edi.