Premer-mınıstr Álıhan Smaıylovtyń tóraǵalyǵymen ótken Investısııalyq ahýaldy jaqsartý jónindegi keńestiń kezekti otyrysynda Qazaqstannyń densaýlyq saqtaý salasyn odan ári damytý máseleleri talqylandy, dep habarlaıdy Egemen.kz Aqordanyń baspasóz qyzmetine silteme jasap.
Is-sharaǵa Ulybrıtanııanyń Qazaqstan Respýblıkasyndaǵy Elshisi Ketı Lıch, Kanada Elshisi Alan Hemson, AQSh Elshisi Denıel Rozenblıým, Dúnıejúzilik bank pen Sıtıbanktiń Qazaqstan boıynsha ókilderi, Ernst & Young, AstraZeneca, Janssen jáne Pfizer kompanııalarynyń ókilderi, sondaı-aq Qazaqstan Respýblıkasynyń ortalyq memlekettik organdarynyń basshylary qatysty.
Jıynǵa qatysýshylar zamanaýı medısınalyq tehnologııalardy engizý, densaýlyq saqtaý ınfraqurylymyn jańǵyrtý, bilikti mamandar daıarlaý, farmasevtıka salasyn damytý, halyqtyń ınnovasııalyq dári-dármekterge qoljetimdiligin arttyrý, shalǵaıdaǵy eldi mekenderdiń turǵyndaryna medısınalyq qyzmet kórsetý jáne basqa da birqatar máseleni jan-jaqty talqylady.
Premer-mınıstr sońǵy jyldary Qazaqstanda densaýlyq saqtaý salasynda aýqymdy reforma júrgizilip jatqanyn atap ótti. Atap aıtqanda, Biryńǵaı ulttyq densaýlyq saqtaý júıesi quryldy, mindetti medısınalyq saqtandyrý engizildi, telemedısına damyp keledi, qural-jabdyqtar men dári-dármekter satyp alý prosesi jaqsardy, dárigerlerdiń jalaqysy edáýir artty.
«Jalpy, Úkimet 2027 jylǵa qaraı medısına salasyn qarjylandyrý deńgeıin IJО́-niń 5%-na deıin jetkize otyryp, atalǵan salany damytýdyń turaqty modelin qurý boıynsha jumys júrgizip jatyr. Osyǵan oraı biz ınvestısııalar men ozyq tehnologııalar tartýǵa múddelimiz», dedi Álıhan Smaıylov.
Ol Úkimet qabyldap jatqan sharalar salanyń ınvestısııalyq tartymdylyǵyna oń áserin tıgizetinin aıtty. Máselen, ótken jyldyń qorytyndysyna sáıkes densaýlyq saqtaý salasyndaǵy negizgi kapıtalǵa salynǵan ınvestısııa kólemi shamamen $540 mln-dy qurap, 30%-ǵa ósti. Sonymen qatar sońǵy 7 jylda farmasevtıka naryǵynyń kólemi 2,9 esege artty.
Onyń aıtýynsha, medısına ınfraqurylymyn jaqsartý boıynsha keshendi sharalar qabyldanyp keledi. Máselen, Prezıdent tapsyrmasy boıynsha jeke ınvestısııalar tartý arqyly 20 zamanaýı kópbeıindi aýrýhana salý josparlanyp otyr. Sondaı-aq «Aýyldyq densaýlyq saqtaýdy jańǵyrtý» ulttyq jobasy aıasynda 655 alǵashqy medısınalyq-sanıtarııalyq kómek kórsetý nysany paıdalanýǵa berilip, 32 kópbeıindi aýdandyq aýrýhana jańǵyrtylady.
Premer-mınıstr Úkimet memlekettik qoldaý sharalarynyń paketterin usyna otyryp, farmasevtıkalyq ındýstrııanyń álemdik iri ókilderimen de belsendi iskerlik baılanystardy arttyratynyn atap ótti. Osylaısha, Pfizer kompanııasymen Dári-dármek óndirisin lokalızasııalaý boıynsha ınvestısııalyq kelisim jasaý josparlanyp otyr. AstraZeneca kompanııasymen ınvestısııa kólemi $32 mln bolatyn biregeı dárilik zattardyń kelisimsharttyq óndirisin qurý týraly ýaǵdalastyqqa qol jetkizildi.
Sonymen birge Qazaqstan Prezıdentiniń AQSh-qa sapary barysynda GE Healthcare kompanııasymen quny $60 mln bolatyn medısınalyq tehnıka óndirisin lokalızasııalaý jónindegi negizdemelik kelisimge qol qoıyldy. Sondaı-aq Roche kompanııasymen $2,5 mln somaǵa birqatar joba pysyqtalyp jatyr. Ońtústik Koreıa, Túrkııa, Egıpet jáne Izraıl ınvestorlarymen kelisim-sharttyq óndiris jobalary júzege asyrylyp jatyr.
«Dárilik zattarǵa suranystyń artýy aıasynda densaýlyq saqtaý salasynyń, onyń ishinde farmasevtıka ónerkásibiniń damý áleýeti óte zor», dep atap ótti Álıhan Smaıylov.
Jıyndy qorytyndylaı kele Premer-mınıstr ýákiletti memlekettik organdarǵa keńes barysynda aıtylǵan usynystar men usynymdar boıynsha jumysty pysyqtaýdy tapsyrdy.