Memleket basshysy respýblıkalyq pedagogter sezinde qala men aýyl mektepterindegi bilim sapasynyń teńsizdigin joıý týraly aıtty, dep habarlaıdy Egemen.kz.
«Aýyl balalarynyń bilim alý múmkindigi shekteýli ekeni barshaǵa málim. Buǵan qajetti qural-jabdyqtyń jáne bilikti pedagogterdiń tapshylyǵy sebep bolyp otyr. Aýyldaǵy bilim oshaqtarynyń teń jartysy – shaǵyn mektepter. Onda barlyq pánniń muǵalimi bola bermeıdi. Bir synypta ártúrli jastaǵy balalar oqıdy. Munyń bári – jyldar boıy qordalanǵan túıtkilder. Onyń kóbi jurttyń jappaı qalaǵa kóshýine baılanysty týyndap otyr. Aýyl mektepterin zııatkerlik, sondaı-aq qoǵamdyq ortalyq retinde damytý mańyzdy», dedi Memleket basshysy.
Budan soń ol memleket pen bıznestiń seriktestigi arqyly aýyl mektebin jańǵyrtý jumystary qolǵa alynǵanyn aıtty.
«Mektebi bar aýylda tirshilik bar» dep beker aıtylmaǵan. Mektep birneshe áleýmettik nysannyń rólin atqarady. Onda qoǵamdyq jıyndar, mádenı is-sharalar, sport saıystary ótedi. Aýyl mektebi jergilikti jurtty ortaq iske jumyldyrady. Osy oraıda kásipkerler qaýymyna da zor mindet júkteledi. Qazir memleket pen bıznestiń seriktestigi arqyly aýyl mektebin jańǵyrtý jumystary qolǵa alyndy. Osy tásilmen úsh jyldyń ishinde kem degende bir myń aýyl mektebin kerek-jaraqpen tolyq jabdyqtaý qajet», dedi Prezıdent.
Sondaı-aq ol aýyl mektepteriniń kitaphanalaryn damytý máselesine mán berý kerek ekenin aıtty.
«Kitaphanada qajetti kitaptyń bári bolýy kerek. Iаǵnı, ádebıet qala jáne aýyl oqýshylaryna birdeı qoljetimdi bolýǵa tıis. Balalarǵa teń múmkindik berý úshin bilim sapasyn barlyq óńirde birdeı jaqsartý kerek. Otbasy jaǵdaıyna, ósken ortasyna qaramastan, barlyq balanyń sapaly bilim alýǵa qaqy bar», dedi Q.Toqaev.