Memleket basshysy Qasym-Jomart Toqaev «Samuryq-Qazyna» AQ basqarma tóraǵasy Nurlan Jaqypovty qabyldady, dep habarlaıdy Egemen.kz Aqordanyń baspasóz qyzmetine silteme jasap.
Memleket basshysyna Qordyń bıylǵy 8 aıda atqarǵan jumysynyń qorytyndysy jóninde baıandaldy.
Prezıdentke «Samuryq-Qazyna» AQ kompanııalar tobynyń óndiristik jáne qarjylyq kórsetkishteri, sondaı-aq jyl qorytyndysy boıynsha kútiletin nátıjeleri tanystyryldy.
Sonymen qatar Qorǵa qarasty kompanııalar tobynyń mańyzdy jobalaryn júzege asyrý barysy jóninde málimet berildi. Máselen, jyl sońyna deıin alty iri jobany, atap aıtqanda Astrahan – Mańǵyshlaq sý qubyryn rekonstrýksııalaý, «Sarsha» jáne «Jyly jaǵajaı» eldi mekenderine gaz qubyryn tartý, Beıneý – Jańaózen gaz qubyrynyń 2-shi jelisin jáne Maqat – Soltústik Kavkaz gaz qubyrynyń lýpıngin salý, birinshi GRES-tiń 1-shi blogyn qalpyna keltirý, Qazaqstan Respýblıkasynyń Biryńǵaı elektrenergetıkalyq júıesine qarasty batys aımaǵyndaǵy elektr jelilerin kúsheıtý jobalaryn aıaqtaý josparlanyp otyr.
Budan bólek, Memleket basshysyna Qor aktıvterin jekeshelendirý josparynyń iske asyrylý barysy jóninde málimet berildi. Bıyl 10 qarashaǵa deıin KEGOC kompanııasynyń SPO-syn aıaqtaý josparlanyp otyr.
Kezdesý sońynda Qasym-Jomart Toqaev ınvestısııalyq jobalardy júzege asyrý, sondaı-aq «Samuryq-Qazyna» qoryna qarasty beıindi emes aktıvterdi jekeshelendirý jáne kompanııalarǵa halyqtyq IPO ótkizý jóninde birqatar naqty tapsyrma berdi.