Memleket basshysy Qasym-Jomart Toqaev Joldaýda turǵyn úı-kommýnaldyq sharýashylyq sektoryndaǵy jelilerdiń tozǵanyn aıtyp, «Tarıfti ınvestısııaǵa aıyrbastaý» jańa tarıftik saıasatyna kóshý týraly aıtqan edi. Bul jańashyldyq ınfraqurylymǵa ınvestısııa salýdy jáne ashyqtyqty qamtamasyz etý úshin memlekettik monıtorıng júıesine qatysýdy kózdeıdi.
Búginde Memleket basshysynyń tapsyrmasyn oryndaý úshin turǵyn úı-kommýnaldyq sharýashylyq salasyna ınvestısııa tartýǵa «Tarıfti ınvestısııaǵa aıyrbastaý» saıasatyna kóshýdi qamtamasyz etý jóninde baǵdarlama bekitilgen. Endi osy baǵdarlamany iske asyrý barysynda 2023-2029 jyldarǵa 3 myń shaqyrymǵa jýyq kommýnaldyq jelilerdi, onyń ishinde sýmen jabdyqtaý jáne sý burý jelilerin jańǵyrtý úshin 400 mlrd teńge ınvestısııa tartý kózdelipti. Bul 2029 jylǵa qaraı jelilerdiń tozýyn shamamen 20%-ǵa tómendetýge múmkindik beredi. Bıyl jyl basynda «Tabıǵı monopolııalar týraly» Zańǵa túzetýler engizildi. Osy jóninde Ulttyq ekonomıka mınıstrligi Tabıǵı monopolııalardy retteý komıtetiniń Sýmen jabdyqtaý jáne sý burý salasyndaǵy retteý basqarmasynyń basshysy Aınur Ibraeva tarqatyp aıtyp bergen edi.
«Qabyldanǵan túzetýler sheńberinde osy jyldyń ekinshi toqsanynda Ulttyq ekonomıka mınıstrligi Tabıǵı monopolııalardy retteý komıteti sýmen jabdyqtaý jáne sý burý salasynda tarıfter men ınvestısııalyq baǵdarlamalardy ózgertýge qatysty 30 ótinim bekitti. Bul sharalar tabıǵı monopolııalar sýbektilerine qosymsha ınvestısııa tartý esebinen jóndeý jumystaryn ulǵaıtý jolymen kommýnaldyq jelilerdiń tozýyn 2029 jylǵa 20% tómendetýge jol ashady. Sondaı-aq avarııalar sanyn, ajyratýlar men shyǵyndardy azaıtýǵa, rettelip kórsetiletin kommýnaldyq qyzmetterdiń sapasyn jáne senimdilikti jaqsartýǵa múmkindik beredi», deıdi basqarma basshysy.
Osynyń esesine tabıǵı monopolııalar sýbektileri qyzmetkerleriniń jalaqysyn salalyq ortasha kórsetkishke deıin arttyrýǵa bolady eken. Mysaly, sýmen jabdyqtaý jáne sý burý salasyndaǵy shamamen 50 myń qyzmetkerdiń tabysyn 135 myń teńgeden 200 myń teńgege deıin ulǵaıtý josparlanypty. Sonymen qatar 2,7 myń shaqyrymnan asa ıesiz sýmen jabdyqtaý jáne sý burý jelilerin senimgerlik basqarýǵa, kommýnaldyq menshikke berý kórsetiletin qyzmetterdiń turaqtylyǵyn qamtamasyz etýge múmkindik bermek.
Tabıǵı monopolııalar sýbektileriniń tıimdiligin arttyrý maqsatynda halyqaralyq uıymdardyń konsýltanttaryn tarta otyryp, tarıftik ádisnamany reformalaý boıynsha jumys úılesim tapqan. Jańa tásilder salaǵa uzaqmerzimdi ınvestısııalardy tartýǵa, kórsetiletin qyzmetterdiń sapasyn arttyrýǵa, shyǵyndardy qysqartýǵa múmkindik beredi. Odan ári tarıftik saıasat tutynýshynyń qarajatyn maqsatty paıdalanýdy qatań baqylaýmen, halyqtyń muqtaj toptaryn áleýmettik qoldaýmen, tabıǵı monopolııalar salasyndaǵy qyzmetti memlekettik retteý rásimderiniń jarııalylyǵyn qamtamasyz etýmen súıemeldenedi. Bir sózben aıtqanda, tarıftik saıasat sýmen jabdyqtaý jáne sý burý jelileriniń jumysyn odan ári senimdi qamtamasyz etý úshin ınvestısııa tartýǵa baǵyttalǵan.