Polısııa qyzmetkerleri spýtnıkterdi paıdalana otyryp, qarasora ósiriletin jerlerdi anyqtaýdy qolǵa aldy, dep habarlaıdy Egemen.kz vedomstvonyń baspasóz qyzmetine silteme jasap.
«Jyl saıyn maýsym-qazan aılary aralyǵynda jabaıy qarasoranyń ósip-jetilýi kezeńinde Ishki ister mınıstrligi «Qarasora» respýblıkalyq jedel-profılaktıkalyq is-sharasyn ótkizedi. 1 maýsymnan beri atalǵan shara barysynda 820 esirtki qylmysy anyqtaldy. Alty uıymdasqan qylmystyq toptyń áreketi toqtatylyp, olardyń jetekshileri men 54 qatysýshysy qylmystyq jaýapkershilikke tartyldy. Zańsyz aınalymnan 32 tonna esirtki tárkilendi, onyń ishinde 5,3 tonnaǵa jýyq marıhýana, 476 kelige jýyq gashısh, 241 keliden astam «sıntetıka» jáne 62 keliden astamy geroın ónimi. Qyzylorda, Túrkistan jáne Ulytaý oblystarynda qarasora ósirilgen 65 plantasııa anyqtaldy. Olardyń jalpy aýmaǵy 10 gektardan asty. Bul rette salmaǵy 20 tonnadan asatyn 70 myńnan astam qarasora butalary tárkilenip, joıyldy. Mundaı esirtki ósimdikterin anyqtaý úshin polıseıler Ulttyq ulannyń tikushaqtaryn paıdalanyp, «Búrkit» arnaıy jasaǵynyń qyzmetkerlerin jumyldyrady. Qyzylorda, Aqtóbe, Túrkistan jáne Ulytaý oblystarynyń aýmaǵynda 150 myń sharshy shaqyrymnan asatyn jer tekserildi. Jalpy 70 ret áýeden barlaý júrgizildi», delingen habarlamada.
Esirtki ósimdikterin ósirýshilerdi anyqtaý úshin «Qazaqstan Ǵarysh sapary» AQ ǵaryshtyq spýtnıkteri arqyly jer beti qashyqtyqtan tekserilip, esirtki plantasııasy bolýy múmkin 60 geografııalyq aýmaqtyń koordınaty polısııaǵa joldanǵan. Qazir atalǵan faktige qatysty tergeý amaldary júrgizilip jatyr.