Qytaıdyń Hanchjoý qalasynda ótken HIH jazǵy Azııa oıyndarynda áıelder kúresinen 76 keli salmaq dárejesinde Jámıla Baqbergenova kúmis medal ıelendi. Fınalda qyrǵyz balýany Aıperi Medetqyzyna ese jiberdi. Jámılanyń ákesi, bilikti bapker Naýqannur Baqbergenulymen tildesip, balýan qyzynyń beldesýine qatysty pikirin bildik.
– Kóp ata-ana balalarynyń iri dodalardaǵy aıqasyn tamashalaýǵa kelgende degbiri qashatyny belgili. «Balasy atqa shapsa, anasy úıde otyryp taqym qysatyn» elmiz. Egiz qyzyńyzdyń syńary Jámılanyń jazǵy Azııa oıyndaryndaǵy beldesýin tamashaladańyz ba?
– Buryn qaraıtynmyn, keıingi kezde ásirese bıyl Serbııada ótken álem chempıonatynan keıin kórmeıtin boldym. Anasy men ulym tikeleı efırden qalt jibermeı tamashalaıdy. Al men qyzdarym kilemge shyǵatyn kúni Alladan járdem, kúsh-qýat surap, meshitke baryp duǵa tilep syrtta júremin. Beldesýin sońyra ıýtýbtan kórem. Qyrkúıek aıynda Serbııanyń astanasy Belgradta ótken álem chempıonatynyń jartylaı fınalynda mońǵol qyzyna ese jiberdi. Ony Jámıla buǵan deıin úsh ret aıqyn utqan bolatyn. Keıin ózi de aıtty, sol beldesýde ol fınalǵa shyqqan AQSh balýanyn oılap abdyrady. О́ıtkeni byltyrǵy álem chempıonatynyń fınalynda amerıkalyq balýanǵa ese jiberip, kúmis medaldi mise tutty. Esemdi qaıtsem de qaıtaramyn dep júrip jartylaı fınalda mońǵol qyzymen kúreste asyǵyp ta ketti.
– Jámıla Serbııada ótken álem chempıonatynda qola medal oljalady. Arada eki apta óter-ótpes ýaqytta Azııa chempıonatynyń fınalyna jetti. Iyǵyndaǵy jaraqatynan qulan-taza aıyqpaǵan sekildi.
– Iá, oń ıyǵynyń jaraqaty bar. Onyń ústine buryn 72 keli salmaqta kúresti, Qytaıdaǵy Azııa oıyndaryna 76 kelide qatysty. Bul olımpıadalyq salmaq sanalǵandyqtan myqtynyń bári osynda. Fınaldyq beldesýin keıin qaıtalap ta kórdim, jańa salmaq dárejesine aýysqany aıqyn baıqalyp turdy. Múmkin kúshi jetpeı qalǵan shyǵar, áıtpese jyǵatyn zor múmkindigi boldy.
– Erterekte áleýmettik jelide Jámılanyń sıyr saýyp otyrǵan beınejazbasy tarady. Egiz qyzdaryńyzdy úı sharýasyna salatyn sııaqtysyz. Azııanyń úsh dúrkin chempıony, dúnıe chempıonatynyń úsh márte júldegerin «jumsaý» qıyndyq týdyrmaı ma?
– Eń birinshi Madına men Jámıla – meniń qyzdarym. Meıli ol Olımpıadany úsh márte utsyn, álem chempıonatynda on ret jeńiske jetsin, men úshin balam ǵana. Shynyn aıtqanda balalarymnyń sporttaǵy jetistiginen góri keleshekte otbasynyń uıytqysy bolyp, salıqaly urpaq ósirip, elge tulǵa bolar azamattar tárbıelese, men úshin sol maqtanysh. Qyz qonaq qashanda. Erteń bular jat shańyraqtyń bosaǵasyn attap kelin atanady. Sol kezde úıdiń sharýasyn isteı bilmese ózine syn emes pe? Anasynyń tárbıesi solaı, ekeýi de bala kúninen úıdiń tirshiligin atqaryp ósti. Tipti asaý úıretken jastaıynan. 25 jyldaı boldy, jylqy ósiremiz. Jámıla da Mádına da jetkinshek shaǵynda bastyqpaǵan asaýdy ózderi ustap úıretip jýasytyp alatyn. Árbir ata-ana qyzdy da, uldy da eń aldymen adam etip tárbıeleýge tıis dep sanaımyn. Sportshyǵa eń áýeli minez kerek. Álıhan Bókeıhanov atamyz aıtpaqshy, «ultqa qyzmet etý bilimnen emes, minezden» qashanda. О́zim de 17 jyl fýtbol oınadym, 22 jyl Almaty qalasynyń olımpıadalyq rezervin daıarlaý mektebin basqardym. Sondyqtan sporttyń qandaı aýyr jol ekenin jete bilemin. Qyzdarymnyń da osy aýyr joldy tańdap, sportty serik etýi minezinen dep sanaımyn.
– Jámıla olımpıadalyq salmaqqa aýysty.
– Iá, ázirge salmaǵy jetińkiremeıdi. Onyń ústine 76 keli Olımpıada baǵdarlamasyna engen salmaq bolǵandyqtan dúnıeniń tórt tarabyndaǵy men degen myqtynyń bári bar. Solarmen taıtalasa júrip kelesi jyly ótetin Parıj olımpıadasyna qatysyp, elimizdi qýantýǵa bar kúshti salamyz.