Qarlyǵa Naýryzbaeva Sátbaev qalasyndaǵy «Ertegi» bóbekjaıynda tárbıeshi bolyp jumys isteıdi. Ol О́.Baıqońyrov atyndaǵy Jezqazǵan ýnıversıtetin bastaýysh synyp muǵalimi mamandyǵy boıynsha támamdaǵan soń, eńbek jolyn naq osy ujymda bastaǵan edi. Ushqyr ýaqyt-aı, mine, on segiz jyl óte shyǵypty.
Ol «ótken kúnde belgi joq» degenmen kelispeıdi. Aýyzsha aıtylyp jatatyn sansyz rahmetti aıtpaǵanda, resmı marapattar qanshama? Bular ótken kúnniń belgisi emes pe? Onyń alǵan Alǵyshat, Qurmet gramotalary jeterlik. Bıyl da Sátbaev qalalyq bilim bóliminiń Alǵyshatyn jáne Ulytaý oblystyq bilim, ǵylym jáne bıýdjettik uıymdar kásipodaǵynyń Qurmet gramotasyn ıelendi.
– Bul marapattarǵa da úlken rahmet, árıne. Biraq men úshin eń keremet tartý – Ermek Ádilbaıuly men Gúlshat Serikqyzy esimdi ata-analardyń quttyqtaýy boldy, – deıdi ol.
Ustazdar merekesi kúni Ermek pen Gúlshat ózderiniń 7-synypta oqıtyn Imran, 5-synyptaǵy Málıka, 2-synyptyń oqýshysy Ismaıl jáne «Baldyrǵan» tobynyń tárbıelenýshisi Isamýdın esimdi ul-qyzdaryn ertip, Qarlyǵanyń qushaǵyn gúlge toltyrypty.
– Bizdiń tórt balamyz da Qarlyǵanyń qolynan ótti. Jazý, sýret salý, án aıtý, tipti júrip-turýǵa da sol úıretti. Balalarymyzdyń oqýda ozat, ónerli bolýy balabaqshadaǵy alǵan tálim-tárbıeniń jemisi dep bilemiz. Sondyqtan Qarlyǵa Hamıtqyzyn merekesimen quttyqtap, kóńilimizdiń belgisindeı gúl shoqtaryn syılaýdy jón kórdik, – degen Gúlshatqa qalaı rıza bolmasqa.
Adamnyń rııasyz kóńiline ne jetsin? Etken eńbek, tókken ter júrgen ortańdaǵy qadirińdi arttyryp qana qoımaıdy, oılamaǵan jerde óziń de tańqalyp qalatyn osyndaı tamasha tartýǵa da keziktiredi eken.
Ulytaý oblysy,
Sátbaev qalasy